Na memoria di Etzel Provence. Un prominente músiko ku un trayektoria impreshonante.
Na memoria di Etzel Provence.
Un prominente músiko ku un trayektoria impreshonante.
Direktiva di Amak a tuma nota ku ayera djaweps 10 di desèmber, e gran músiko sr. Etzel Provence a bai laga nos.
Durante e dianan tras di lomba, diferente músiko prominente a bai laga nos, i lamentablebemente pa motibu di medidanan tumá den kuadro di Covid-19, e entieronan mester tuma lugá, den un sirkuito familiar, i no tin espasio, pa tene un despedida manera kustumbrá.
Na promé lugá direktiva di AMAK ke duna un palabra di aliento i sosten na famia i amigunan di Etzel i na tur e kantidat di alumnonan ku a risibí formashon musikal serka Etzel na CCC.
Etzel tabata un músiko, ku tabata dominá diferente instrumènt, pero muy en espesial piano i kuarta.
Etzel a yega di toka den diferente Combo i Típiko, i den añanan 60,70 i 80 e tabatin su propio Jazz trio, huntu ku Angel Salsbach riba bas, i Ramon Penzo riba drùm.
E tabata aktivo tambe komo dirigente di kor i tabata forma parti di e direktiva di Kornan Uní.
Etzel tabata direktor tambe hopi aña di CCC i a fungi tambe dosente di muzik na diferente skol.
Ta bon pa agregá na e dedikatorio aki, e hecho ku sr. Etzel Provence huntu ku sr. Richard Simon tur dos dfm a produsí e buki ku diferente kantikanan di mucha.
Diferente di e kantikanan aki tabata forma parti di e obra teatral musikal,” Esta Riku nos bida ta” ku a keda presentá na okashon di apertura di Sentro Pro Arte na 1968 ku diferente komposishon di Etzel Provence i Richard Simon.
E obra musikal a keda presentá na 30 okashon .
E parti teatral tabata na enkargo di grupo di komedia Thalia i e parti musikal tabata na enkargo di Salsbach Jazz trio i Fecco’s Combo.
Finalmente direktiva di Amak, ta bolbe ekspresá palabranan di kondolensia na su señora, su yu muhé Bibi , demas famianan, na su Amigu Angel Salsbach i tur esnan ku tabatin relashonnan musikal ku Etzel Provence durante tur añanan.
Ku Etzel sosegá na pas den brasa di Señor.
Na nòmber di direktiva