Selikor tratando pa minimalisá retraso den rekohementu di shushi kas

 

Siman pasá Selikor a bolbe enkontrá ku difikultat na su ekiponan pa rekohé shushi di kas. Konsekuensia di esaki ta ku tin algun bario ku no a haña servisio. E barionan akí ta entre otro Julianadorp, Muizenberg, Roi Catootje, Zeelandia, Stenen Koral, Goede Hoop, Souax Pariba i Monteverde. For di awe lo bai sigui plania e rutanan segun e dianan normal ku énfasis riba e barionan ku siman pasá a keda atras. 

Personal di Selikor ta trahando duru hasiendo lo máksimo pa yuda normalisá e situashon pa rekohé tur shushi di kas i asina eliminá e retraso den e skema promé ku dianan di fiesta binidero. Pa kaba ku eventual retraso lo traha tambe den fin di siman pa rekohé shushi.

Habitantenan ku tuma nota ku Selikor a pasa den nan bario pero no a bai ku nan shushi di kas, por tuma kontakto ku nos departamentu di Servisio na Kliente na 434-1300.

Nos ta konsiente ku e situashon aktual ta inkómodo pa kada habitante ku sigur ta eksperensiá ekseso di shushi dilanti di nan kas. Selikor ta keda komprometé pa kumpli ku nos responsabilidat riba nos maneho di shushi.