KOMUNIKADO DI KUERPO POLISIAL KÒRSOU Atendementu ku multitut na Royal Marina

KOMUNIKADO DI PRENSA 499 / 2020
20 desèmber 2020
Atendementu ku multitut na Royal Marina
Departamentu di Komunikashon i Prevenshon

KUERPO POLISIAL KÒRSOU
Telefòn: 866-6150 • 866-6152 • 866-6153 •
866-6154 • 866-6156 • 866-6158 •
E-mail: pr.polis@polis.cw
Wèpsait: http://www.polis.cw
Facebook : Korps Politie Curaçao
Adrès: Winston Churchillweg z/n • Willemstad • Curaçao
SIRBI I PROTEHÁ
Kuerpo Polisial a tuma nota di algun di e reakshonnan riba entre otro retnan sosial ku a laga
sentido di preokupashon, konfushon i kisas te asta desepshon serka sierto siudadanonan,
debí na e fórmula ku a apliká pa atendé ku un multitut djabièrnè último na un sentro di
dibertishon na Royal Marina.
Polis ke keda enfatisá, ku konforme indiká den nos komunikado di prensa 496/2020, a
kuminsá aktua di forma represivo kontra di violashonnan den kuadro di Covid-19.
Djabièrnè último, tabata e Tim Multidisiplinario ku a bai tene un kontrol den e área aki.
E tim aki ta unu limitá na personal i e ta konsentrá partikularmente riba establesimentunan
di pèrmit. Pues benta i uso di alkohòl, orario di seramentu, operamentu di negoshi sin
pèrmit, bendementu di bebida den bòternan no seyá (bottling), ets.
Naturalmente na momentu ku nan topa situashonnan di aglomerashon i otro
violashonnan, nan ta haña respaldo di otro koleganan di Kuerpo Polisial ku ta enkargá
spesífikamente ku e parti di mantenshon di òrdu públiko.
Den e kaso spesífiko di djabièrnè 18 di desèmber 2020, e tim despues di a risibí
informashon, a bai na un establesimentu riba e tereno i a bin topa un kantidat di alrededor
di 100 persona sinta aglomerá, konsumiendo alkohòl.
En bista ku e tereno ta hopi habrí, e públiko a kuminsá plama na momentu ku nan a nota
presensia di polis.
Sinembargo a trata na kontené parti di e públiko ku kier a sali ku nan vehíkulo dor di tene e
entrada prinsipal será.
Miéntras ku algun personal di e tim tabata atendiendo paden ku esun responsabel pa e
establesimentu i repartiendo un prosès verbal p’e, e otro parti di e grupo tabata okupando
su mes ku kontrol di e diferente vehíkulonan ku tabata sali.
Miéntras e públiko tabata plama i alehá nan mes for di e tereno, polis a pidi refuerso di mas
unidat pa por a dil di un manera mas responsabel ku e situashon i pa keda ten’e bou di
kontrol.
Finalmente a yega un kantidat limitá di refuerso, pasobra na e momentu ei tabatin algun
otro kaso di prioridat haltu ku tabata tumando lugá riba nos isla, ku tabata rekerí e
presensia di unidatnan di mantenshon di òrdu.
I opviamente, kontrario na e deseo di polis pa por a repartí prosès verbal pa maske ta algun
di esnan ku tabata den violashon, mester a opta pa laga e públiko ku ainda por i kier a sali di
e entrada prinsipal, bandoná e sitio ku un atvertensia.
Ku esaki Kuerpo Polisial no kier hustifiká e aserkamentu di e situashon aki i ta laga espasio
pa esnan ku ta mir’e di otro forma. Sigur no, despues ku e mes a anunsiá di ta bai aktua di
forma represivo kontra tur esnan ku ta den violashon.
Pero pa algun faktor ku no tabata na su fabor, mester a hasi un eskoho di laga e ‘show’ sigui
te na momentu ku bo por a garantisá di tabatin sufisiente yudansa i duna algun siudadano
un prosès verbal, òf para e aktividat inmediatamente i atendé ku esun responsabel dor di
dun’e un but i sera e negoshi.
Kisas di e forma ei, e mensahe lo tabata mas kla pa komunidat ku nos ta biba e loke ku nos
ta prediká, semper kalkulando si, e rísikonan di seguridat ku ta/por eksistí pa nos
koleganan.
Despues di un evaluashon interno ku a tuma lugá e siguiente dia djasabra,Kuerpo Polisial a
skohe pa krea mas kapasidat riba kaya durante oranan di anochi pa atendé ku e tipo di
kasonan aki kaminda por tin gruponan grandi den violashon di reglanan stipulá.
Di e manera ei ta evitá ku e situashon manera djabièrnè último por ripití.
Kuerpo polisial ta garantisá komunidat ku su esfuerso ta, pa kada siudadano mantené su
mes na reglanan vigente i wòrdu trata di forma hustu.