Ta bèrdat ku Minister/Tim di kontrol a keda sin parti but pa violashon di e lei di estado di emergensia?

Gilmar “Pik” Pisas

 

Willemstad, 20 di desèmber 2020

 

Presidente di Parlamento di Kòrsou

Señora A. Pauletta

Wilhelminaplein # 4

PRESENTE

 

Señora Pauletta,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di asuntunan general, señor Quincy Girigorie.

 

Danki pa e koperashon.

 

Atentamente,

 

Gilmar Pisas

Parlamentario pa

frakshon di MFK

Minister di Hustisia

Señor Quincy Girigorie
PRESENTE

Kòrsou, 20 di desèmber 2020


Tópiko: Ta bèrdat ku Minister/Tim di kontrol a keda sin parti but pa violashon di e lei di estado di emergensia?

 

Apresiabel señor Minister,

 

Frakshon di MFK a tuma nota ku den kontrolnan ku kuerpo Polisial huntu ku MEO a tene a diskubrí un fiesta kaminda tabatin mas di shen (100) hende presente. Durante di e kontrol aki Minister di hustisia tambe tabata presente i a presensia tur loke tabata i a sosodé.

 

Nos mas ku algun siman pasa bo persona komo Minister di hustisia tabata esun ku na nòmber di gobiernu a sali na defensa di e lei di eksepshon aki ku un gran parti di pueblo tabata kontra di dje. Frakshon di MFK tampoko no tabata di akuerdo ku e lei aki, pero apesar di tur e krítikanan e 11 Parlamentarionan ku ta sostené gobiernu a aprobá e lei aki. 

 

Den ménos ku un siman ku a aprobá i publiká e lei aki, gabinete Rhuggenaath a emití un estado di emergensia, base di estado di emergensia aki ta e lei di eksepshon. E “Ministeriele Beschikking” (MB) a bin Parlamento i den un reunion públiko ku karakter di urgensia Parlamento a aprobá e MB presentá dor di gobiernu ku ta rigi e estado di emergensia. Ministerio Públiko a emití un lista di but ku lo ser apliká ora tin violashon di artíkulonan di lei di e estado di emergensia. 

 

Den komunikado di prensa di kuerpo polisial fecha 18 di desèmber 2020, numerá 496/2020, kuerpo polisial ta informá ku “Polis lo bai aktua represivo pa ku violashon di medidanan relashoná ku Covid-19”. Pero ora a konstatá e violashon Minister deklará “Ku lo no parti but pa esnan ku tabata violá lei, na e aktividat ku tabatin mas ku 100 hende, si no lo kaba te mainta”. 

 

Miéntras ku pa violashonnan mas chikí ku a konstatá for di dia ku e lei aki a drenta na vigor, si a apliká duna esnan ku a violá lei but.

 

Hasiendo uso di artíkulo 96 di Reglamentu di órden di Parlamento di Kòrsou, nos kier a hasi Minister Girigorie e siguiente preguntanan;

 

  1. Ta bèrdat ku durante di kontrolnan dor di Polis i MEO a topa ku un fiesta kaminda tabatin mas di 100 hende presente?

 

  1. Minister por informá Parlamento na kua sitio esaki tabata i ken ta esun ku a organisá e fiesta aki?

 

  1. Minister a deklará ku lo no ta parti but si no ta kaba te mainta, dikon no a registrá tur esnan presente i e próksimo dia di trabou lo a traha e butnan?

 

  1. Den un reakshon di kuerpo polisial riba komentarionan den medionan sosial, kuerpo polisial ta duna otro motibunan pakiko no a parti but, manera entre otro ku na e momentunan ei tabatin otro kaso di prioridat haltu tabata tumando lugá riba nos isla, ku tabata rekerí presensia di e unidatnan di mantenshon di órden, kua vershon ta bèrdat esun di Minister ku lo a kaba te mainta òf esun aki di kuerpo polisial? 

 

  1. Kuantu mas o ménos e butnan aki lo a generá pa kaha di gobiernu?

 

  1. Minister a deklará ku e fiesta tin un tinta polítiko, Minister por informá Parlamento si e fiesta aki a wòrdu organisá pa un partido polítiko i kua partido esaki ta i si tabatin polítikonan i/òf mandatarionan presente?

 

  1. Ken tabata esun ku e responsabilidat i/òf ken ta esun ku tabata liberá e kontrolnan, un funshonario di kuerpo polisial, un funshonario di MEO òf Minister di hustisia?

 

  1. Kua ta e artíkulo(nan) di lei ku ta duna esun na mando (di akuerdo ku kontesta na pregunta 5) e outoridat pa a keda sin parti but pa esnan ku a violá e lei di estado di emergensia?

 

  1. Esnan ku den e último dianan aki a risibí un but pa violashon di e lei di estado di emergensia, tambe lo wòrdu informá ku nan ta haña eksonerashon i no tin nodi di paga nan but?

 

  1. Si esnan ku a haña un but bai korte pa risibí trato igual, gobiernu ta kere ku tin base legal pa gobiernu por defendé su mes?

 

  1. Kon ta bai sigui ku e kontrolnan den futuro i kon ta bai hasi parti but, awor ku Minister i/òf esun responsabel a krea un presedente dor di keda sin parti but ora a konstatá e violashon di lei djabièrnè último?

 

  1. Athunto un lista di kartanan ku miembronan di frakshon di MFK a manda pa Minister di hustisia ku pregunta, kartanan ku e awe no a wòrdu kontesta. Minister por informá frakshon di MFK pa ki fecha nos lo haña kontesta riba e kartanan aki?

 

Sperando ku e biaha aki si Minister lo kontesta den e tempu definí den e protokòl firma entre gobiernu di Kòrsou i Parlamento, pa asina pueblo i komersiantenan por sa e dikon di e desishon di keda sin parti but

Atentamente

 

Gilmar Pisas

Parlamentario pa

frakshon di MFK

This site uses Akismet to reduce spam. Learn how your comment data is processed.

error: Content is protected !!
%d bloggers like this: