Proseso ku ta andando pa yega na un operador nobo pa nos refineria

 

Willemstad, 26 di desèmber 2020

 

Presidente di Parlamento di Kòrsou

Señora A. Pauletta

Wilhelminaplein # 4

PRESENTE

 

Señora Pauletta,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di asuntunan general, señor Eugene Rhuggenaath.

 

Danki pa e koperashon.

 

Atentamente,

 

Gilmar Pisas

Parlamentario pa

frakshon di MFK

 

Minister di Asuntunan General

Señor Eugene Rhuggenaath
PRESENTE

Kòrsou, 26 di desèmber 2020

Tópiko: Proseso ku ta andando pa yega na un operador nobo pa nos refineria

 

Apresiabel señor Minister,

 

Frakshon di MFK a tuma nota ku a kuminsá di nobo ku un proseso pa buska un operador pa nos refineria. Pa frakshon di MFK ta sumamente krusial i importante pa e trayekto aki kana di un forma transparente i limpi. Esaki debí ku no tin espasio pa un otro fayo den e búskeda aki, manera Kòrsou a eksperensia ku grupo Klesch.

 

Desempleo na Kòrsou bou di bo gabinete a konosé sifranan rèkert i Kòrsou mester krea mas kupo di trabou pa por trese alivio pa famianan kaminda mama i tata ta sin un entrada. Ta p’esei nos di MFK ta asina preokupá pa e di dos trayekto aki tambe no resultá den un frakaso meskos ku e promé trayekto. Nos preokupashon ta oumentá ora nos tuma nota ku gran parti di esnan ku ta forma parti di PMO ta e mesun personanan ku ya tabata tei den e promé trayekto ku a frakasá.

 

Pa e motibunan ariba menshoná i hasiendo uso di artíkulo 96 di Reglamentu di órden di Parlamento di Kòrsou, nos kier a hasi Minister Girigorie e siguiente preguntanan;

 

1. Kòrsou na e momento nan aki no por permití su mes e luho ku e proseso ku ta andando lo resultá den un frakaso manera e promé proseso, Minister ta kompartí e opinion aki?

 

1. RdK/PMO a anunsiá ku tin tres (3) partido ku a entrega un “Non Binding Proposal”, Minister por konfirmá pa nos ku tur e tres partidonan ku a entrega un oferta a bishita e fasilidatnan di refineria pa wak esakinan promé ku a duna un oferta?

 

1. Si kompanianan ku a duna un oferta i no a bishita e instalashonnan di refineria, kon serio por tuma e oferta ku nan a hasi?

 

1. Minister ta tene kuenta ku e dos kontraktnan ku a firma pa instalashonnan di Bullenbaai a ser firma sin ku e kompanianan a bin mira e instalashonnan i tur e dos kontraktnan aki a resultá den un frakaso?

 

1. Segun informashon ku nos ta manehá e direktor di RdK ta kombersando ku kompanianan Hulandes, miéntras ku na vários okashon e direktor mes a deklará ku e invershonistanan Hulandes no ta kere den nos refineria, esaki ta kuadra ku bèrdat?

 

1. Prioridat di gobiernu ta pa nos refineria ta operashonal mas pronto posibel,  Minister por informá nos si RdK/PMO ta kumpliendo ku e instrukshon aki di gobiernu pa e refineria ta operashonal mas pronto posibel?

 

1. Minister por konfirmá pa nos, si e ekstenshon ku RdK/PMO a duna pa entrega e “Non Binding Proposal” nan tabata pa privilegiá un kompania ku no a entrega su oferta den e tempu ku a ser definí promé ku a alarga e periodo?

 

1. Si kontesta na pregunta 7 ta afirmativo, kiko bo persona komo e Minister responsabel a hasi pa no tin un “Unfair Competition” pa ku esnan ku si a entrega nan oferta na tempu?

 

1. Minister por informá di kuantu hende PMO ta konsistí i ken ta tur e personanan ku ta formando parti di PMO?

 

1. Nos por haña un “Breakdown” di kuantu sèn a wòrdu gasta te ainda den búskeda di un operador nobo pa refineria?

 

1. Dikon si RdK ta kai bou di responsabilidat di promé Minister, ta Minister di ekonomia ta esun ku ta papiando na radio emisoranan riba e trayekto di búskeda di un operador?

 

Sperando ku Minister lo kontesta nos karta den e tempu definí den e protokòl firma entre gobiernu di Kòrsou i Parlamento, pa asina pueblo por sa kon kos ta kanadó relashoná ku búskeda di un operador nobo pa nos refineria.

 

Atentamente

 

Gilmar Pisas

Parlamentario pa

frakshon di MFK