Gobièrnu di Kòrsou ta firma MUO ku Fundashon ARBJ  i FDDK pa desaroyo di tereno deportivo na Muizenberg.

Gobièrnu di Kòrsou ta firma MUO ku Fundashon ARBJ  i FDDK pa desaroyo di tereno deportivo na Muizenberg.

 

Willemstad- Riba djamars 5 di yanüari 2020 Gobièrnu di Kòrsou a firma un MOU ku ARBJ Foundation i Fundashon Desaroyo Deporte Kòrsou (FDDK) pa desaroyo di Little League ballpark na Muizenberg, den un stadion di Beisbòl profeshonal.

 

Gobièrnu pa medio di Ministerio di Enseñansa, Siensia, Kultura i Deporte i Ministerio di Tráfiko, Transporte i Planifikashon Urbano, a start ku un trayekto pa yega na un maneho nobo pa atendé ku mas di 160 fasilidatnan deportivo ku nos isla konosé. Konforme e maneho nobo Gobièrnu ya a sera akuerdo di maneho ku diferente di e organisashonnan ku ta bini na remarke pa hasi esaki segun un lista di kriterio. 

Sektor Kultura & Deporte huntu ku Domeinbeheer a kana e trayekto akí ku a start ku inventarisashon di e fasilidatnan i seguidamente a organisá un periodo di inskripshon kaminda tur organisashon por a inskribí. Awe a toka turno pa firma akuerdo ku e fundashon di e konosido pelotero yu di Kòrsou Andruw Jones, ARBJ Foundation.

 

ARBJ Foundation lo bai desaroyá Fèlt Little League Ballpark. E Fundashon tin planes pa desaroyá e fèlt di Muizenberg segun e standard nan di MLB (Major League Baseball) kaminda nos muchanan por praktiká for di Little League Baseball te na nivel Dòbel A. E stadion aki tambe den futuro por fungi komo stadion di anfitrion pa weganan di beisbòl ku hungadónan internashonal.

 

Minister Croes ta sumamente orguyoso i gradesido pa desaroyo di e fèlt aki. Di e manera aki nos muchanan fo’i chikí por siña i desaroyá nan mes i tambe nos por sigui brinda Kòrsou i mundu henter hungadónan di taya den beisbòl. Deporte ta importante pa formashon di nos muchanan i proyektonan manera esaki ta krusial.

 

Minister Jesus-Leito di VVRP ta kontentu ku e proyekto aki a kristalisá pa asina hasi mihó uzo di terenonan di Gobièrnu destiná pa deporte na bienestar di hubentut di Kòrsou.

 

Sr. Vergilly Winklaar di FDDK a deklará di ta sumamente kontentu ku e proyekto aki komo ku e stadión ta similar na e stadiònnan di Little League na Williamsport na Merka. Ta un honor pa FDDK yuda kristalisá un proyekto asin’aki. Ta un proyekto di deporte ku Kòrsou por ta hopi orguyoso di dje na momentu ku esaki ta kla.

 

Sr. Andruw Jones ta kontentu ku por a yega na un akuerdo ku Gòbienru di Kòrsou pa e proyekto aki. i ku atrabes di e ARBJ foundation lo bai tin fondonan disponibel pa kristalisá e bunita proyekto aki. 

This site uses Akismet to reduce spam. Learn how your comment data is processed.

error: Content is protected !!
%d bloggers like this: