”Komprenshon tin su límite. Awor si ta basta FLOW/UTS!”
”Komprenshon tin su límite. Awor si ta basta FLOW/UTS!”
Willemstad- Pa parlamentario Calmes kompania FLOW/UTS tin ku drecha su servisio lihé. Diferente kliente a aserka Frakshon di Calmes kaminda nan a ekspresá nan disgustu pa ku e servisio di FLOW/UTS. Riba media nan sosial nos por tuma nota dje avalancha di krítika riba e servisionan di FLOW/UTS.
Resientemente Calmes a pasa na un sukursal di FLOW/UTS i a keda asombrá di loke e mes a mira i tambe tende di esnan presente. N’e sukursal kaminda Calmes a pasa tabata tin hende sinta pafó bou di un tènt, maske áwaseru tabata kai, pa miedu di pèrdè turno. Pa kolmo e tènt mes ta len un banda. Otro klientenan tabata para den rei ku tabata yega te n’e botika den bisindario. Ta vários empresa mester a tuma medida den kuadro di COVID-19. Sinembargo e kliente no por bira e víktima dje forma aki. Loke a asombrá Calmes mas te klientenan ku tabata wardá nan turno den outo pa por skapa e áwaseru ku ta kai. Pa Calmes:“E trato aki no por i no ta aseptabel!”. Alabes Calmes ta proponé pa nan pone un rei pa klientenan 60+.
Na opinion di Calmes si e kontrakt di benta di UTS tabata unu bon trahá ta imposibel ku e Minister di Telekomunikashon no por hasi nada. Privatisashon di UTS mester a trese e mehorashon manera e Minister a primintí den Parlamento sinembargo esaki a bira un desepshon. “Hasta komprenshon pa problemanan tékniko, ku “box” òf instalashon tin su límite i esaki a pasa”: sigun Calmes. Minister mester kai aden i Fondo pa Konsumidó tambe pa protehá e pueblo. No por sigui asina mas. Ta basta!
