Falta di fondo i hopi awaseru ta reto grandi pa mantenshon di nos ret di kayanan Pa por aliviá e situashon Servisio pa Obra Públiko (OW) ta sigui yena burakunan den nos kareteranan

 

Falta di fondo i hopi awaseru ta reto grandi pa mantenshon di nos ret di kayanan

Pa por aliviá e situashon Servisio pa Obra Públiko (OW) ta sigui yena burakunan den nos kareteranan

 

Willemstad – For di òktober último Servisio pa Obra Públiko (OW) a enkargo pa hasi e trabou di yena burakunan den diferente kaya. Mirando e estado aktual di diferente karetera ta nesesario pa den 2021 tambe kontinuá ku e trabounan aki. E deterioro di nos kayanan, ku ta birando visibel den forma di burakunan den kaya, ta un resultado di falta di sufisiente fondo durante e último añanan pa hasi invershon grandi den nos kayanan pero tambe e kantidat di awaseru eksesivo ku ta kayendo aktualmente. Efekto di La Niña a trese hopi mas tantu yobida ku konsekuensia ku a bin mas barku. E awaseru ta afektá fundeshi di nos kaya i pone ku esaki na sierto kamindnan ta sak i bira un buraku den kaya.  Aparte di esaki, a konsekuensia di e pandemia di COVID-19 den 2020, a pone ku e posibilidatnan finansiero tabata aun mas limitá, ku a trese kune ku te asta trabounan pa yena buraku den kayanan pa aliviá e situashon maske ta temporal, no por a keda hasí na gran eskala. 

 

Pa por mantené nos kayanan den un estado optimal, OW tur aña  mester haña sufisiente fondo. Mirando e situashon di COVID na 2020, gran parti di tur fondo di gobièrnu a bai na tene nos komunidat na bida i na trabou atraves di diferente fondo di sosten. Esaki a konta pa fondonan originalmente destiná pa mantenshon di nos kareteranan tambe. Pues, ku e tiki sèn ku OW tabata tin na su disposishon, a trata na lapi sierto kamindanan, i a sigui yena burakunan aña pasa. 

 

E situashon di COVID-19 no a kambia i fondonan ta keda hopi limitá. Apesar di esaki, Konseho di Minister, mirando e deterioro di nos kayanan, a bai di akuerdo na komienso di aña 2021 ku un plan di emergensia pa evitá ku estado di nos kaya ta bai mas atras. E plan aki ta enserá aseleramentu di  e trabounan pa yena buraku den kayanan, ponementu di un kapa temporario nobo pa algun karetera kaminda yena buraku so no ta yuda mas i drechamentu di algun kaya di tera. Mañan 13 di yanauri 2021 lo kuminsa ehekuta e plan aki  i lo sigui informá komunidat debidamente di tur detaye. 

 

E preokupashon di nos komunidat pa loke ta e situashon di nos kayanan, a pone diferente organisashon tambe move pa yena buraku. E akshonnan aki di un banda sigur por keda mirá komo noble, pero di otro banda e akshonnan aki ta ilegal i kontra nos leinan pasó  sin pèrmit di Ministerio di VVRP, no por hasi esaki. OW ta pidi komunidat komprenshon pa e situashon aktual. Den e siguiente simannan pueblo lo bai mira ku burakunan ta bai keda yena dor di kontratistanan ku tin kontrato legalmente ku OW, i ku lo hasi trabou agudo na sierto kayanan spesífiko ku ta den situashonnan hopi deplorabel. Nos niun no por a premirá COVID-19 ni su konsekuensianan, pero huntu nos lo Sali afó i Kòrsou lo sigui prosperá. 

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: