Partido PAR no ta un opshon di parti di MFK pa forma gobiernu kuné den un próksimo gobernashon

Partido PAR no ta un opshon di parti di MFK pa forma gobiernu kuné den un próksimo gobernashon

 

Nos a tuma nota di konsternashon ku a lanta serka pueblo di Kòrsou, relashoná ku deklarashonnan hasi pa eksponente nan di Partido PAR, relashoná ku e posibilidat ku nan (esta Partido PAR) ta mira pa por traha ku MFK den un próksimo gobernashon. MFK ta solidario ku pueblo di Kòrsou i meskos ku pueblo di Kòrsou, nos di MFK tambe ta konsiente ku partido PAR nunka no a goberná, pa hiba nos dushi Kòrsou na un pais kaminda tin bienestar i prosperidat pa kada un di nos ku a nase i ta biba aki na Kòrsou.

 

Ta fresku ainda den memoria di miembronan di MFK, kon sierto eksponentenan di partido PAR a humiá i akusá nos eksponentenan di ta e ser humanonan di mas degenerá den e komunidat aki, nos no sa ku ki kara liderazgo di partido PAR ta deklará ku awor si MFK ta un opshon pa forma gobiernu huntu ku partido PAR.

 

Si tin un sentido ku MFK ta dispone di dje ala perfekshon, ta esun di analisá strategia polítiko di nos kontrinkantenan. E deklarashonnan aki di parti di partido PAR, ta pa trese konsternashon i trata di lanta pueblo di Kòrsou kontra di MFK. Sigur mirando ku na e momentonan aki tur enkuesta ta mustra den direkshon di MFK i esaki ta loke tin partido PAR nèrvioso i ta trata di trese intrankilidat serka e votadornan ku ya a skohe pa depositá nan konfiansa den MFK dia 19 di mart próksimo.

 

Durante di reunion di miembresia di MFK, di djamars 12 di yanüari 2020, miembronan di MFK a tuma e desishon ku partido PAR a hasi hopi daño na MFK i ku partido PAR a humiá di un forma hopi baho eksponentenan di MFK. Presidentenan di Parlamento di partido PAR di e último 4 añanan no a duna oido na Parlamentarionan di MFK, komo e frakshon mas grandi den oposishon. Tur eseinan ta motibu ku membrionan a disidí ku durante di un negoshashon pa yega na un akuerdo di gobernashon, ku partido PAR lo no ta un opshon pa MFK forma gobiernu kune.

 

Na e momentunan aki basta miembro di partido PAR ta bandonando e partido i tin un di e miembronan aki ku resientemente a bandoná partido PAR i un otro ku for di 2016 a bandoná, partido PAR ku a solisitá pa bira miembro di MFK.

 

MFK tin un komishon di miembro nobo, ku ta papia ku tur kandidato ku solisitá pa bira miembro i pa medio di un “scoring sheet” ta skor e kandidato. E komishon aki ta duna un konseho na direktiva pa sea tuma i/òf rechasá e petishon pa miembresia. Den kaso di e dos personanan aki, tur dos a haña un konseho positivo di parti di komishon di lista i direktiva a aprobá nan komo miembro di MFK i esaki no mester ta motibu pa pániko ni deskonfiansa, no ta promé biaha ku MFK ta tuma eks miembro di un partido komo miembro di MFK.

 

Nos ta spera ku e komunikado aki lo trese klaridat i trankilidat serka esnan ku ta bai vota pa MFK i pa pueblo en-general. Nos kurason ta sigui bati pa Kòrsou.

 

Sithree van Heydoorn

Presidente di MFK

 

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: