Den kuadro di seguridat di usuarionan di e área rondó di eks teater Cinelandia a duna e doño òrdu pa basha esaki abou.
Den kuadro di seguridat di usuarionan di e área rondó di eks teater Cinelandia a duna e doño òrdu pa basha esaki abou.
Despues di a tuma nota di e diferente raportnan di estado deplorabel di eks teater Cinelandia i hiba kombersashon ku tantu e doño di edifisio i organisashonnan di interes, Minister Jesus-Leito a tuma e desishon pa ordená e doño pa basha esaki bou. Ministerio di Tráfiko, Transporte i Planifikashon Urbano a bini ta kana un trayekto di investigashon, inspekshon i kombersashon, pa awe a yega na e desishon aki.
Den e raportnan e diferente ekspertonan, ingeniero, ta yega na e konklushon ku e edifisio su estado tékniko ta asina deplorabel ku esaki no por wòrdu restourá mas. Diferente parti di e konstrukshon ta di tal manera ku e betòn ta kibra te ku bo por mira e herunan i tambe partinan di e konstrukshon di glas dilanti na edifisio ta bini abou regularmente. Tur esakinan ta kousa peliger pa esnan ku ta trafiká den área di e edifisio aki. Den un di e último raportnan ekspertonan ta hasi menshon di peliger di derumbe agudo.
Pa un gran parti di nos komunidat Teater Cinelandia ta karga hopi rekuerdo i tin un balor sentimental. Pa hopi aña e la sirbi komo e símbolo di ekspreshon di arte i ambiente pa nos hendenan. Su arkitektura tabata unu ku semper a resaltá na entrada di nos sentro di siudat.
Apesar di esakinan e edifisio pa basta aña ta un ruina i tambe e aspekto di higiena parti paden di e edifisio ta laga hopi di deseá.
Pues Minister Jesus-Leito a ordená e doño pa denter 1 luna di tempu basha e edifisio abou. Pa hasi esaki e doño lo mester entrega un plan di demolishon kual mester keda akordá promé ku kuminsá ku e trabounan di demolishon. Ta e intenshon pa e doño sigui despues ku desaroyo nobo na e sitio aki.
Den kuadro di transparensia Minister Jesus-Leito a informá e diferente organisashonnan di interes pa loke ta trata monumentonan , di e desishon aki.