Minister Xiomara Maduro ta invita pa sintonisa: Un programa informativo na television ’35 aña di Status Aparte – Un lucha cu a marca historia’
Minister Xiomara Maduro ta invita pa sintonisa:
Un programa informativo na television ’35 aña di Status Aparte – Un lucha cu a marca historia’
ORANJESTAD – Minister di Cultura ta informa cu dia 1 di januari 2021 a conmemora cu 35 aña pasa Aruba a haya su Status Aparte denter di Reino Hulandes. Minister Maduro ta yama Aruba pabien cu 35 aña di nos Status Aparte y ta yama danki na tur hende cu ta contribui na e desaroyo positivo di nos Pais. E mandatario ta enfatisa cu ta importante pa nos ta bon informa y sa historia di nos Pais. Pa e motibo ey lo pasa un programa informativo na canalnan di television pa asina pueblo di Aruba ta bon informa tocante historia di Status Aparte di nos Pais.
E programa informativo ’35 aña di Status Aparte – Un lucha cu a marca historia’ lo tin como invitado, ex Prome Minister di Pais Aruba sr. Nelson Oduber, un persona cu a experiencia e lucha di Status Aparte hunto cu Nos Libertador Betico Croes den feliz memoria. Durante di e programa sr. Oduber lo brinda informacion riba diferente componente importante di e lucha di Status Aparte y lo haci referencia na desaroyonan importante di Status Aparte, kico esaki a nifica pa Aruba den pasado, presente y den futuro. E programa lo wordo presenta pa sr. Giovanni Muller.
’35 aña di Status Aparte – Un lucha cu a marca historia’ lo wordo pasa na TeleAruba, Canal 22 y Diario TV, 5 minuut prome cu nan programa di Noticia entrante diabierna 15 di januari 2021 y lo termina diabierna 22 di januari 2021.
Minister Xiomara Maduro ta gradici ex Prome Minister sr. Nelson Oduber pa su cooperacion pa comparti cu pueblo di Aruba e importancia di e historia y nificacion di Status Aparte pa Pais Aruba ‘Un lucha cu a marca historia’. Alabes e dignatario ta gradici Giovanni Muller pa por a presenta e segmentonan di e programa.
