Èks Hefe di Kuerpo Polisial sr drs. Mauricio Sambo, ofisialmente enkargá ku koperashon i desaroyo Polisial den Reino.  

 

Èks Hefe di Kuerpo Polisial sr drs. Mauricio Sambo, ofisialmente enkargá ku koperashon i desaroyo Polisial den Reino.   

 

Entrante 1 di novèmber 2020 último, drs. Mauricio Sambo a keda ofisialmente distituí for di e funshon di hefe di kuerpo polisial Kòrsou i enkargá ku e tarea di “Portefeuillehouder Ontwikkeling en Samenwerking Caribische Politiekorpsen”, esta, responsabel pa koperashon i desaroyo di e Kuerponan Polisial den Karibe. E tareanan aki ta basá riba proposishon di Minister di Hustisia di Kòrsou den e Justitieel Vierlanden Overleg (JVO) di Yüli último, kua proposishon a keda akordá dor di Minister di Hustisia i Seguridat di Hulanda, sr. Grapperhaus i tambe Minister di Hustisia di Sint Maarten, Sra Richardson.  

Manera ta konosí, dia 24 di Yüni último, despues di manifestashonnan den Fòrti ku a sali for di man, hefe di kuerpo polisial sr. Mauricio Sambo den un kombersashon ku Minister di Hustisia a rekonosé ku e situashon den Fòrti no mester a yega asina leu i ku esaki por a wòrdu prevení. Komo tal, el a asumí responsabilidat pa e aktuashon polisial  i a pone su funshon na disposishon di Minister di Hustisia. 

Entrante 25 di Yüni, sr Raymond Ellis, hefe suplente di Kuerpo Polisial Kòrsou, ta enkargá ku e tareanan di Hefe di Kuerpo. 

Durante último añanan, sr. Sambo, komo presidente di e kolegio di hefenan di kuerpo polisial Karibense a pone un fundeshi fuerte di bon koperashon entre Kuerponan Polisial den Reino Hulandes. Parti di esaki ta e kordinashon di desaroyo di e Kuerpo di kada pais.

Pa garantisá kontinuashon di e koperashon entre kuerponan di e paisnan di reino, sr. Sambo for di su funshon nobo lo ta enkargá tambe ku tareanan di entre otro kordinashon di akuerdonan ku ta keda será  durante e asina yamá  JVO ( enkuentro ministerial di  Ministernan di Hustisia di e 4 paisnan di reino ku ta tuma lugá kada 6 luna ).

Algun trayekto importante ku mester di bon kordinashon ta e formashon  struktural pa polis, abastesimentu di e kuerponan ku material i ekspertisio pa nan por hasi e trabou di un manera efisiente, e trayekto di atkerí i kompartí informashon inter regional  i  e  koperashon ku Hustisia Merikano. 

Huntu ku e desishon en kuantu sr. Sambo, Konseho di Minister a bai di akuerdo pa den kuadro di e trayekto di fortifikashon di tim di maneho di Kuerpo Polisial Kòrsou, den un término korto, habri e funshon di Hefe di Recherche i Informashon (RID) i tambe Operashon Interno (Bedrijfsvoering), ku ta dos funshon sumamente importante pa funshonamentu di e Kuerpo, ku ta konsistí di alrededor 800 funshonario. Entretantu e funshonnan aki lo wòrdu supstituí dor di otro funshonarionan. E funshon di Hefe di Servisio di Polis Uniformá (Politiedienst) lo wòrdu ehersé dor di sr J. Ilario. Despues di yena e 2 funshonnan menshoná, lo habri e vakatura pa reklutá un hefe di kuerpo polis nobo.  

E ehersisio aki, kompañá ku pasonan manera invershonnan pa atkirí material nobo pa Kuerpo Polisial, invershon den e Plan di Seguridat di lokalidatnan Polisial, introdukshon di e base legal lokal pa funshonamentu di Kuerpo Polisial (Politieregeling i Besluit Rechtspositie) i trayektonan di mehorashon manera di JZZ,  mester guia na un Kuerpo fuerte pa enfrentá retonan benidero.