Lider Partido Democraat Elsa Rozendal: Minister VVRP sea transparente i splika kiko ta e problema real
Lider Partido Democraat Elsa Rozendal:
Minister VVRP sea transparente i splika kiko ta e problema real
No ta e siman aki ni siman pasá, pero ta basta luna kaba ku outomobilistanan ta pidi atenshon pa e deterioro di kayanan na Kòrsou. No ta solamente kamindanan prinsipal, pero tambe kayanan den barionan ta den un situashon hopi malu. No papia mes di kayanan di tera den diferente bario rònt Kòrsou. Nos pais a keda bendishoná ku basta áwaseru ku a kuminsá asta algun luna promé ku fin di aña. Banda di esei e entrada di Corona virus na komienso di 2020 a afektá funshonamentu di nos komunidat den vários sentido. Elsa Rozendal lider polítiko di Partido Democraat ta trahando pa yega na un Kòrsou diferente, i e situashon di nos kayanan tambe meresé atenshon speshal.
No ta un sekreto ku mayoria hende na Kòrsou ta sòru di tin nan propio vehíkulo pasobra di otro manera ta sumamente difísil pa yega bo destino na tempu. Un outo òf otro tipo di vehíkulo motorisá no ta un luho mas. Konsekuentemente ta esensial pa nos kayanan ta den bon estado. E situashon a bira asina horibel ku praktikamente tur dia por a skucha na radionan i tambe riba retnan sosial kon hendenan den komunidat ta sulfurá kada bia ku nan kibra nan tire i otro piesa bou di nan outo. Nos por a tuma nota kon abitantenan den algun bario a bira inventivo i kuminsá tuma akshon pa yena algun buraku ku tera òf betòn i asta algun a disidí na planta mata den e burakunan.
Gobernashon ta mira dilanti i antisipá riba desaroyonan i den e kuadro ei Elsa Rozendal, e lider polítiko di Partido Democraat ta pidi minister di VVRP pa duna komunidat splikashon kla i amplio riba e mantenshon di nos kayanan. E minister a splika resientemente ku lo no tin asfalt na Kòrsou i despues a bisa ku no tin sèn. Elsa Rozendal ta konvensí ku Kòrsou por enfrentá e problemanan aki, pero mester kuminsá atendé e situashon ku e seriedat nesesario. Ta importante pa minister Zita Jesus-Leito splika komunidat kiko ta e problema real.
Partido Democraat su Agenda21 ya kaba a pensa riba sistemanan kreativo i inovativo pa atendé ku e retonan den nos infrastruktura. Elsa Rozendal su bista ta riba futuro pa un Kòrsou diferente i p’esei mester kuminsá hasi kosnan diferente. Minister di VVRP ta na turno pa splika komunidat kua ta e problema real.
