Minister Xiomara Maduro ta informa: Gobierno ta sigui ofrece Subsidio di Salario den aña 2021 pa yuda comercio tene cupo di trabou Desde 20 te cu 27 di januari por aplica pa Subsidio di Salario pa januari via MiSVB

 

Minister Xiomara Maduro ta informa:

Gobierno ta sigui ofrece Subsidio di Salario den aña 2021 pa yuda comercio tene cupo di trabou

Desde 20 te cu 27 di januari por aplica pa Subsidio di Salario pa januari via MiSVB

ORANJESTAD – Pa comercio y trahadornan por surpasa e crisis economico cu COVID19 ta trece cune, Gobierno di Aruba a bin ta ofrece yudansa den forma di Subsidio di Salario. Desde mei 2020 companianan cu ta bin na remarca pa e yudansa aki ta wordo notifica door di SVB y ta haya un plazo di tempo den cual mester aplica pa e yudansa aki pa asina por cubri un maximo di 60% di e salario di trahador. E meta di e yudansa financiero aki ta pa durante e crisis di COVID19 por conserva cupo di trabou na beneficio di Aruba su economia. Den aña 2020 Gobierno a brinda 271.7 miyon na yudansa den forma di Subsidio di Salario. Pa aña 2021 ta premira pa reserva den Presupuesto di Pais Aruba e suma di 280 miyon florin pa por sigui brinda e yudansa necesario pa surpasa e efectonan economico cu e pandemia di COVID19 ta trece cune. 

Minister Maduro ta informa cu e registracion pa Subsidio di Salario pa luna di januari ta cuminsa dia 20 di januari y ta sera dia 27 di januari 2021. Pago ta wordo haci diariamente pa compania cu nan aplicacion a keda aproba. Comerciante cu tin pregunta riba Subsidio di Salario por tuma contacto cu SVB via MiSVB na http://www.svbaruba.org . Den caso di obhecion por manda esaki via bezwaarloonsubsidie@svbaruba.org. Den caso cu un trahador kier sa mas riba e yudansa aki, por acerca nan doño di trabou cu e peticion pa por mira e informacion di e subdidio cu ta toca e trahador. E ultimo aki ta un condicion pa otorgacion di Subsidio di Salario stipula den articulo 6 inciso h den e Decreto Ministerial di Minister di Finansa, Asunto Economico y Cultura di 13 di mei 2020 cu number 681/20, cu ta contene e decision pa otorga sosten financiero den forma di Subsidio di Salario.