PIN den 2021: Dotá ku 21

 

Partido Inovashon Nashonal (PIN) a kana un proseso bon planiá i transparente pa yega na un lista di kandidato pa elekshon di mart 2021. PIN a skohe pa kalidat di e kandidatonan i e mihó balansa entre tur e kriterionan ku a ser fihá dor di direktiva di PIN adelantá i den un fase tempran. Eksperiensha di gobernashon, kompetensha pa inová, determinashon pa logra kambio, kurashi i representashon di diferente aspekto di nos komunidat manera género, bario, gremio, tipo di preparashon, ta entre e kriterionan ku mas ta resaltá. P’esei, sin behèit, PIN ta mira riba un lista ku ta hasi e diferensha na e siguiente elekshon. No tin tempu pa kore “stage” ni den Parlamento ni den gobièrnu na e momentunan aki, mirando ku pais ta pasando den momentunan difisil. 

 

PIN un biaha mas ta briya ku e sekso femenino, kombiná ku eksperensha i konosementu vasto den gobernashon. Den su tòp 10, banda di su lider indiskutí, sra. Suzy Camelia-Römer, PIN tin no menos ku 3 dama mas dentro di kual un eksperto finansiero ku eksperiensha den parlamento, Abigail Paula (#2);  eks-minister di Enseñansa, Siensia, Deporte i Kultura, Marta Dijhoff (#7) i un maestro di skol, versá tambe den músika i arte, Mercée Doran (#8). Ku e kandidatonan aki i esnan ku ta sigui, PIN ta bai elekshon ku un lista dotá ku hopi eksperiensha riba praktikamente tur area di gobernashon. Suzy Römer a okupá e karteranan di Hustisia, Ekonomia i tabata Minister-Presidènt pa despues di a distanshá for di polítika algun aña, regresá komo Minister di Tráfiko, Transporte i Planifikashon Urbano i último komo Minister di Salú, Medioambiente i Naturalesa. Suzy a sa di kaba e hospital nobo na tempu, sin sa ku Kòrsou lo a bai dependé tantu riba dje djis algun luna despues ora ku Covid-19 a yega Kòrsou. Ta e proyekto di mas grandi i kompliká ku Kòrsou a konosé den e ultimo dékada. Danki na e eksperiensha, determinashon, kurashi i konosementu di Suzy awe nos por hala rosea trankil.

 

PIN a kombiná e multiple talentonan i eksperiensha di di Curtly “G-no” Valeriaan (#3) den deporte, trabounan sosial i merkadeo, Kenneth Martis (#4) den desaroyo laboral i ekonomia i e hoben debutante den polítika Elior “Eli” Boeldak (#5) den enseñansa, deporte i merkadeo. Otro lider den deporte, Kenneth “Kenny” Pieter (#9), ta reforsá e tòp 10 di lista di PIN. Pa lokual ta trata desaroyo sosial, sigur mirando e pandemia i su konsekuenshanan ku tei ketu bai, PIN por konta tambe ku respaldo di Sheila Coffie-Whieskie (#14) i Sonaida “Lili” Hellburg (#15). E eksperiensha i konosementu di Nehomar “Neo” Mateo (#16) riba mantenshon di òrdu i seguridat, kombiná ku su konosementu di lokual ta biba den komunidat ta base pa implementashon di hopi akshon di PIN riba tereno di barionan dushi pa biba aden. 

 

PIN ta demostrá tambe di ta e úniko partido ku tin atenshon pa medioambiente, naturalesa i desaroyo duradero di e sektor agropekuario, esta agrikultura i peska. P’esei na #6 di su lista tin Clifford de Lannoy, eksperto den e materia di medioambiente i naturalesa, Saneleo “Leo” Petronella na #10 i Andrew Krips na #17, ambos agrikultor ku ekperiensha i konosementu amplio di métodonan moderno den e sektor di agrikultura. 

 

PIN su sanger blou kla a kushi duru durante e periodo di gobernashon aki riba tereno di salú. Kyona Daal, hóben spesialisá den maneho di salú i sistema di biba salú ta na #19, pa no laga ningun duda ku e maneho riba wellness -promoshon di salu di kurpa i mente-  i biba un bida salú lo kontinuá.

 

Pa lokual ta trata desaroyo ekonómiko i entrepreneurship, PIN tin un eksperto ku konosementu di ekonomia mundial den persona di Vanessa Toré na #20. Huntu ku Chris Maduro (#18) i Stanley “Juni” Gibbs (#13), ambos empresario, i e eksperto den IT Griorgio Broos (#11), Abigail Paula, Kenneth Martis & G-no Valeriaan, PIN por garantisá un diversifikashon ekonómiko sin presedente, un finansa públiko na òrdu i tambe modernisashon di nos aparato públiko (e-Government). Shandell “Shasha” Matrono (#12) ku hopi eksperiensia komo inspektor anteriormente di ekonomia i awor di labor, tambe ta duna un kontribushon balansá na e desaroyo di maneho aki.

 

Talento lo no skarsa den PIN. Komo kargadó di e lista enkabesá pa Suzy Römer, nos tin nos ménedjer di kampaña ku ta nada menos ku Axel Pikero (#21), músiko profeshonal i rekonosé pa numeroso éksito den nos músika popular i kultural. Axel tambe a demostrá di por dirigí organisashonnan na eksito uzando kreatividat i aserkamentunan inovativo. No tin duda ku PIN ta sali ku su 21 ginetenan dotá dotá rib’un galòp pa haña e konfiansa kompletu di pueblo pa kandidatonan eksperienshá, ku konosementu, determinashon i amor pa nan pais. 

 

Pa mas entrevista, kontaktá Suzy Römer na +5999.5106726 òf Alvin Daal na +5999.5227742

 

Partido Inovashon Nashonal, PIN Elekshon Staten 2021
1	Camelia geboren Römer	Susanne “Suzy” Francisca Coromoto
2	Paula	Allison “Abigail” Ragnhild Abigail
3	Valeriaan	Curtly “G-no” Anthony
4	Martis	Kenneth Russell Erastus
5	Boeldak	Elior “Eli” Monir Edil
6	de Lannoy	Clifford Christopher Thadeus
7	Dijkhoff	Marta Beatriz
8	Doran	Mercée Marie Thérèse
9	Pieter	Kenneth “Kenny” Felipe
10	Petronella	Saneleo “Leo” Thomas de Sales
11	Broos	Giorgio Enrico Gabriel
12	Matrono	Shandell “Shasha” Gregorio
13	Gibbs	Stanley “Juni” Alexander
14	Coffie geboren Whieskie	Sheila Margareth
15	Hellburg	Sonaida “Lili” Helena Clementia
16	Mateo	Nehomar Bautista
17	Krips	Andrew Victor Emanuel
18	Maduro	Christopher “Chris” Michael
19	Daal	Kyona Rusanthy Kimberly
20	Toré	Vanessa Gregoria
21	Pikero	Axel Philip