Preguntanan tokante voorschot na CMC

Na: Minister di Finansa
Sr. K. Gijsbertha
Pietermaai 17
Presente
Willemstad, 1 febrüari 2021
Tópiko: Preguntanan tokante voorschot na CMC
Apresiabel señor Gijsbertha,
Durante di e reunion di tratamentu di presupuesto 2020 minister Zita Jesus- Leito a kontestá, riba
pregunta di Parlamento, ku a duna CMC un voorschot di 68 mion florin.
Durante di reunion di tratamentu di presupuesto 2021 minister Zita Jesus- Leito , riba e mesun
pregunta, a kontestá ku a duna CMC un voorschot di 70 mion florin.
Ademas minister a kontestá ku CMC a paga 12 mion ANG bèk pero pa motibu di COVID-19 no a
paga mas.
Riba pregunta di parlamento minister a kontestá tambe ku no tin un areglo di pago ku CMC pa e suma
di e voorschot.
E intenshon di e voorschot ta pa na momentu ku Cft bai di akuerdo pa Kòrsou hasi un fiansa di 100
mion florin, lo a paga esaki bèk.
Cft a pone komo kondishon ku e mester disponé promé di e second opinion business case di HNO.
E suma risibí komo voorschot ta prosedente di e suma risibí di benta di UTS.
E suma aki ta depositá riba un kuenta na CBCS di kua un parti ta destiná pa CDI, Curaçao
Development Institute.
Un instituto ku meta sostené empresarionan chikitu tantu finansieramente komo den formashon.
A base di e ariba menshoná e frakshon di Movementu Progresivo tin e siguiente preguntanan:
1. Gobièrnu por splika e diferensia di 2 mion florin entre e voorschot menshoná na desèmber
2019 i e voorschot menshoná na desèmber 2020?
2. Gobièrnu por splika kon bini no tabata tin un areglo di pago ku CMC?
3. Gobièrnu tin garantia ku CMC lo paga e suma restante di 58 mion florin bèk?
4. Gobièrnu sa riba ki tèrmino e suma aki lo subi e kuenta bèk di CBCS?
5. Gobièrnu lo drenta un areglo di pago ku CMC a kòrta plaso?
6. Kiko ta e proseso ku a kana pa yega pa aprobá e voorschot menshoná?
7. Ken ta e personanan enbolbí den e proseso pa yega na e desishon pa duna e voorschot
menshoná?
8. Si ta un dekreto ministerial a traha òf un otro dokumento ku ta mustra e tomo di e desishon
riba e tópiko menshoná, nos ta pidi pa manda e dokumento aki pa Parlamento.
Atentamente,
Frakshon di Movementu Progresivo,
Marilyn Moses

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: