Kua ta e motibu, ku Minister Girigorie ta gaña Parlamento, gaña e Klientenan di SDKK i gaña Komunidat kompletu

Willemstad, 8 di februari 2021

 

Presidente di Parlamento di Kòrsou

Señora A. Pauletta

Wilhelminaplein # 4

PRESENTE

 

Señora Pauletta,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di Hustisia, señor Quincy Girigorie.

 

Danki pa e koperashon.

 

Atentamente,

 

________________

Charles Cooper

Parlamentario pa

Frakshon di MFK

 

Na Minister di Hustisia

Sr. Q. Girigorie

PRESENTE

 

Kòrsou, 8 di febrüari 2021

Tópiko:  Kua ta e motibu, ku Minister Girigorie ta gaña Parlamento, gaña e 

   Detenidonan di SDKK i gaña Komunidat kompletu.

 

Gaña Parlamento i gaña pueblo di Kòrsou ta un piká mortal polítikamente i ta esaki minister Girigorie a bin ta hasi, riba vários tema durante di e último 4 añanan komo e titular di Hustisia. Hasta por bisa ku su persona a kuminsá haña e nomber di Minister di INHUSTISIA.

 

Su último mentira den e sala virtual di Parlamento tabata dia 18 di desèmber 2020, kaminda su persona a mal informá Parlamento ku pa yanüari 2021 lo tin banchi pa detenidonan ku a komportá nan bon i ta bin na remarke pa haña 15% di verlòf basá riba e “Ministeriele Regeling” di 2005, pa tin banchi pa nan sali kuné. Tambe Minister Girigorie a informá ku lo firma un kontrato ku un kompania nobo i lo tin 50 banchi na lugá di 17 banchi. Ku esaki lo solushoná e problema di falta di banchi.

 

Nos di MFK a sinta trankil i warda yanüari yega i nos a laga yanüari kaba. Pero awor den febrüari nos mester konstatá ku Detenidonan di SDKK ku mester a sali ku banchi,  ketu bai ta haña tende ku NO TIN BANCHI pa nan sali kuné. Pues esaki ta konfirmá ku Minister Girigorie no a papia bèrdat den e reunion di Parlamento.

 

Hasiendo uso di e derecho konstitushonal ku lei ta duna mi pa medio di artíkulo 96 komo representante di mi pueblo mi ta hasi algun pregunta na Minister di Hustisia;

 

1. Minister ta na altura ku gaña Parlamento i gaña komunidat ta algu inakseptabel?

 

1. Minister por informá Parlamento dikon bo persona ta mal informá Parlamento ku na yanüari 2021 lo a firma kontrato ku un kompania nobo ku ta entrega banchi nan elektróniko i ku lo tin 50 banchi disponibel i ku esaki lo solushoná e problema ku banchi ?

 

1. Minister a firma un kontrato ku un kompania nobo pa risibí e banchi nan, manera primintí i ki fecha esaki a tuma lugá?

 

1. Si e kontesta ta si, Parlamento por haña un kopia di e kontrato aki òf haña “inzage” den dje, esaki debí ku nos no tin niun konfiansa mas den lokual ku Minister a bini ta prediká riba e tereno aki?

 

 

1. Minister ta haña ku Minister por sigui hunga ku Detenidonan di SDKK su sentimentu i nan derechi di haña libertat, di e forma ku Minister a bini ta hasié dor di primintí nan banchi i awor ta resultá ku no tin banchi?

 

Mi ta spera ku Minister Girigorie kuminsá atendé ku bida di hende na serio. Pasobra karma ta mal kos.

 

Atentamente,

 

________________

Charles Cooper

Parlamentario pa

Frakshon di MFK