Minister Zita Jesus- Leito a manda tur trahadó di Wellness kas!

Minister Zita Jesus- Leito a manda tur trahadó di Wellness kas!

Ta di lamentá pa mira kon polítika, arogansia i mal uso di poder ta trapa
bienestar di e komunidat aki. Dia 24 di yüli 2020 señora Suzy-Camelia-Römer
mester a tuma su retiro komo Minister di Salú, Medioambiente i Naturalesa.
Seguidamente, Minister Zita Jesus-Leito ku ya kaba tin e kartera di Trafiko,
Transporte i Planifikashon Urbano, a tuma e kartera di Salú, Medioambiente i
Naturalesa “temporalmente” na su enkargo.
Ta asina ku dia 23 di desèmber 2020, eksaktamente 9:21 di anochi, tur trahadó
di Wellness, inkluso diferente radio, plantanan di televishon i kompanianan privá
ku di un òf otro manera tabata brinda servisio na e diferente proyektonan di
Wellness, a risibí un karta kaminda ta informá ku ta stòp ku tur proyektonan di
Wellness te ku un próksimo aviso, sin un spikashon di tal akshon.
Esaki sin tene kuenta ku kontratonan i palabrashonnan ku ya kaba tabata hasí na
e momentu di kanselashon. Un karta ku a wòrdu firmá komo kapa dor di señor
Sharlon Melfor (sekretario general di GMN i tambe miembro di direktiva di
partido MAN) i señor Philip Martis (direktor di SVB) i no firmá pa e propio
Minister Jesus-Leito.
E akto aki a kai sigur manera un baño di awa friu pa tur e gruponan di interes
mirando ku na ningun momentu so Minister Jesus-Leito no a duna notifikashon
previo ku lo bai anulá e proyektonan aki. Alkontrario, semper den media tantu
Minister Jesus-Leito i nos promé Minister Eugene Rhuggenaath ta gaba
proyektonan di Wellness manera entre otro Kunukito.
E desishon abrupto aki a para proyektonan manera:
• Kunukito di Kas i di Bario ku lo a drenta 12 bario mas adishonal.
• Kunukito di Skol ku lo a drenta 4 skol mas adishonal.
• Kunukito di Instansianan i kasnan pa hende grandi.
• Proyekto “Simia”: Kunukito ku United Nations Development Programme
(UNDP) ku lo a duna mas ku 700 kas na Kòrsou un pakete pa planta nan
propio kuminda.
• Programanan di prevenshon den kolaborashon ku entre otro Famia
Plania i Curaplus.
• Kunukito di prueba na AVB ku gobièrnu a invertí ya kaba miles di florin.
• Finansiamentu di diferente otro proyektonan manera entre otro
plantashon den Otrobanda (Kaya Kaya).
Nos a komprondé via via ku Minister Jesus-Leito ta di opinion ku Wellness ta un
“problema” pa e komunidat, i pa e motibu aki e ta para tur proyekto.
Naturalmente Wellness no por ta bon pa Minister Jesus-Leito, pa e simpel echo
ku e éksito di e proyekto ta danki na trabounan hasí pa su eks kolega, señora
Camelia-Römer. Wellness, esta prevenshon ta di sumo importansia pa un pais i
efektivamente ya komunidat por a kuminsá nota kambionan positivo den
salubridat, danki na proyektonan di informashon i prevenshon di Wellness.
Elekshon ta na kaminda i naturalmente polítiko di un otro partido no tin
“derechi” di bria mas ku nos aktual Minister di Salú.
Komunidat ta na altura ku Wellness ta pará den e akuerdo di gobernashon firmá
na aña 2017 pa e tres partidonan PAR, MAN i PIN.
Minister Jesus-Leito, kon por ta posibel ku awor diripiente Wellness ta malu pa e
komunidat aki?
Banda di e echo ku ta stòp proyektonan di Wellness i asta distruí invershonnan
ya hasí ku plaka di e pagadó di impuesto, ta humano pa manda mas ku 10
trahadó kas den porta di un fin di aña i sin duna un argumento bálido?
Akaso Minister Jesus-Leito no tin kurason?
Ta momentu pa kibra e silensio i informá pueblo kiko enrealidat ta pasando tras
di kòrtina. Gobernantenan mester stòp di wak nan benefisio propio i traha
realmente na bienestar di e pueblo sin duna importansia ken a inisia tal
proyekto.
Ta basta ku inhustisia!
Un palabra di sosten i forsa na nos tur eks trahadónan di Wellness ku na e
momentunan aki tambe ta forma parti di e grupo grandi di personanan
desempeá den e komunidat aki.