Ta ahustá i tambe remplasá lusnan ku no ta fushoná FASE DI PRUEBA DI E PROYEKTO PA TEST LUSNAN DI KAYA DI FUTURO TA PROGRESANDO

 

Ta ahustá i tambe remplasá lusnan ku no ta fushoná

 

FASE DI PRUEBA DI E PROYEKTO PA TEST LUSNAN DI KAYA DI FUTURO TA PROGRESANDO

 

Willemstad- Despues ku Aqualectra a instalá e lusnan di kaya di futuro na diferente sitio riba nos isla awor e proyekto ta den su fase di prueba. E diferente pruebanan pa tèst e lusnan LED inteligente ku mester iluminá nos kayanan den futuro ta progresando. Na e momentunan aki por tuma nota di empleadonan di Aqualectra i kontratistanan ku ta ehersé trabounan pa optimalisá e lusnan afin ku nan ta kumpli ku loke ta keda eksiguí pa Gobièrnu, i tambe tene kuenta ku e kaminda òf bario ku e lusnan mester iluminá.  Aqualectra ta hasiendo varios tèst pa asina por atkerí e konosementu nesesario pa ora yega momentu pa instalá e lusnan riba demas kareteranan di Kòrsou tin un bista di varios aspekto di nan funshonamentu.  Ta den e kuadro aki a konstatá tambe ku tin di e lusnan no ta funshoná i no a pasa e prueba.  Lo remplasá e lusnan aki durante di e proksimo dianan. Di e forma aki por realisá un proyekto mayó pa iluminá kamindanan di Kòrsou ku un ret di lusnan LED inteligente na un forma efektivo i efisiente.

 

Komo parti di e proyekto di prueba Aqualectra, den koperashon ku Gobièrnu di Kòrsou a instalá lusnan LED inteligente na Lagun, Emancipatie Boulevard Dominico Don Martina (Nieuwe Haven), krusada Schottegatweg/Santa Rosaweg i kaminda pa bai Banda Bou.  Instalashon di e lusnan ta un parti di e trabou.  Aktualmente Aqualectra ta realisá e trabounan pa tèst e funshonamentu di e lusnan. Por ehèmpel ta opservá kiko e lusnan ta transmití, i ta ahustá intensidat pa nan kumpli ku eksigenshanan di Opbranan Publiko i ku e ángulo ku nan ta kologá ta korekto. Outomibilistanan por ripará por ehèmpel ku e intensidat di e lusnan riba un Emancipatie Boulevard Dominico Don Martina tin muchu mas klaridat ku den barionan kaminda tin hende ta biba manera Lagun. Banda di esaki ta realisá e asina yamá “drive tests” pa perkurá ku ora bo ta stür outo bo no ta keda konfrontá ku intensidat di lus di ripiente. 

P’esei Aqualectra ta pidi komprenshon di shòfùrnan ora ku topa ekiponan ta traha riba kaminda.

 

Aqualectra den realisashon di e proyekto aki ta konta ku sosten di LED Roadway Lighting Ltd (LRL) komo proveedor. LRL ta un kompania di propietarionan Kanades ku ta diseñá i produsí lusnan di kaya LED i solushonnan inteligente pa siudatnan. E kompania ta den industria di diseñá i produsí lusnan konfiabel pa mas di 19 aña kaba. LRL a produsí i entregá mas di un mion lus di kaya di kua aproksimadamente 300 mil den Karibe.  Nan ta proveedó di mas di 25 pais den region i mas di 60 pais rònt mundu. LRL a keda selektá komo e proveedó di e lusnan di kaya inteligente den un proseso di destaho kompetivo internashonal.