Partido Democraat ta boga pa mas aktividat di deporte, kultura i formashon personal.

Partido Democraat ta boga pa mas aktividat di deporte, kultura i formashon personal.

Transformashon di nos sistema di edukashon ta un meta di Partido Democraat.

Partido Democraat ta boga pa kuminsá inkorporá kambionan importante ku riba término kòrtiku por aportá ku formashon di nos mucha i  hobennan.

 

“Un di mi puntonan di prekupashon pa loke ta trata nos mucha i hobennan ta e momentunan ku nan no ta na skol. A base di hopi kòmbersashon durante añanan ku hobennan di diferente skol, algu ku ta bin dilanti konstantemente ta e kantidat di ora ku nan ta pasa sin supervishon di mayor. Hobennan ta indiká na mi ku nan sa pasa entre 6 pa 8 ora despues di skol riba nan telefòn. Hopi bia ku sintimentunan di apatía, demotivashon i asta depreshon komo resultado”, palabranan di Isaura Maxwell, representante di e sektor di edukashon, deporte i kultura riba lista di Partido Democraat.

 

Komo posibel solushon pa esaki Partido Democraat tin den su programa di Partido fasilitashon di aktividatnan di guia di tarea, deporte, kultura i formashon personal den oranan di atardi, dor di hasi nan aksesibel na skolnan mes. Ora e mayor kaba ku trabou e por pasa buska e yunan na skol i usa e oranan despues pa “quality time” ku nan.

 

No ta e idea pa dosentenan bai traha di mainta te atardi. Sino entre otro krea posibilidat di trabou pa personanan ku por traha den oranan despues di skol.

 

Tambe Partido Democraat ta pensa riba e posibilidat di ofresé mas fleksibilidat pa entre otro mayornan ku ta traha. Dunando na mayornan ku ta deseá di traha for di kas of traha menos e oportunidat pa hasi esaki pa asina por pasa mas tempu ku nan yunan.

 

“Hopi di nos muchanan ta siendo “eduká” dor di nan telefòn. Ta responsabilidat di nos komo adulto pa kambia esaki i krea momentunan di konekshon ku tur nos muchanan pa sigurá e atenshon, dedikashon i amor ku nan meresé.” Isaura Maxwell a finalisá bisando.