TUMBA REVIVAL FESTIVAL  2021 A RESULTA UN EKSITO TOTAL

TUMBA REVIVAL FESTIVAL  2021 A RESULTA UN EKSITO TOTAL

 

WILLEMSTAD — Direktiva di AMAK i e komishon organisadó di e Tumba Revival Festival 2021, ta sumamente satisfecho ku e resultado di e siman, kaminda pueblo por a gosa di un forma adaptá di nos tremendo kreashonnan di tumba.

 

Danki na tur e branding partnernan Gobièrnu di Kòrsou, Massive Productions, Medical Laboratory Services, Licores Maduro, Ofisina di Turismo ( CTB),  Banco di Caribe , Venequip Curaçao I UTS/Flow, huntu ku nos spònsernan: Truss by Rich; Curaçao Professional Fireworks; Hacienda Olivia;  Coca Cola,  Frankys Chair & Table rental,  Kortijn Ijs, Unique Point  i  Leo Sound and Lighting ku a koperá pa e siman bira un éksito kulminando ku e show bibu djabièrnè dia 12 di febrüari den Curaçao Festival Center.

 

Menshon spesial mester ser hasi na e gran trabou di tur nos músikonan ku a partisipá tantu den e orkesta All Star komo tambe Excellence  bou di e direkshon di  respektivamente Gregory Colina i Gedeon  Chandler.

Gregory a duna tambe un aporte balioso na realisashon di e evento.

 

Ta bon pa menshoná aki ku den e konsepto aki, naturalmente no por a laga tur e tumberonan partisipá i importante ta pa menshoná  ku énfasis a keda pone riba e ritmo di  TUMBA. Pa motibunan di reglanan estrikto di TAC Team, NO por a inkluí p.e. gruponan di baile, ya ku e máksimo riba esenario  tabata stipulá na e kantidat di músikonan ku a presentá.

 

Mester aklará un biaha mas ku eróneamente algun media ta menshoná ku Gobièrnu a aportá ku 50 mil florin na e evento. Esei no ta kuadra ku realidat i Gobièrnu a aportá ku un suma  menos ku e montante menshonå, mes un kos ku ela hasi den e aktividatnan di Pasku i tambe algun evento mas den e dianan aki. E suma aki a keda destiná pa kubri un kompensashon na e músikonan ku a partisipá.

 

Direktiva di AMAK ta sumamente agradesido na e reakshon positivo ku nos a risibí for di tur skina den Reino Ulandes. Na Aruba i Boneiru e final di Tumba Rivival 2021, a resoná den tur skina, miéntras na Ulanda nos kompatriotanan a gosa un mundu di e evento aki.

 

Na Kòrsou mes tabata tin un sintonia total i pueblo kompletu a disfrutá i sigui e transmishonnan via di Tele Curaçao, TV Direct, Vigilante TV, Facebook di Festival di Tumba i tur otro plataforma.

Un bon trabou tambe di e team di produkshon di Tele Curaçao. E show a kuminsá eksaktamente 7 or i a tèrminá 12 or konforme e palabrashonnan stipulá den e protokòl.  Aki mester hasi bon menshon di e bon trabou di e stage manager di Cesar Rodriguez i su team. Aparte di e hecho ku Massive Productions tabata un branding partner, mester menshoná e tremendo trabou di kordinashon ku nan a realisá.

 

Ta bon pa hasi menshon tambe na e tremendo trabou ku Truss By Rich a realisá den  infrastruktura di Festival Center. Un danki spesial tambe ta bai na Leo Sound & Lighting tambe a  koperá bon ku tur e ensayonan di Excellence. E magno evento aki a finalisá ku un tremendo vürwèrk  di parti di Gustavo Semeler di Curaçao Professional Fireworks.

 

Direktiva di AMAK ta bolbe enfatisá ku ta un ekipo grandi a traha pa realisá e proyekto aki i nos ta manda un gradesimentu masha spesial na Rignald Maduro ku aparte tabata forma parti di e komishon a guia e show, asistí pa Armando Huerta den un forma profeshonal.

 

AMAK ta sumamente satisfecho na tur esnan ku a ekspresá nan gradesimentu i  e proyekto aki a keda realisá komo un forma di gratitut na pueblo di Kòrsou ku a sostené Festival di Tumba durante 50 aña largu.

Danki na tur medio di komunikashon, instansianan di Gobièrnu, Minister Steven Croes i kuerpo polisial.

 

Ta huntu nos a logra.

 

Atentamente

 

Direktiva di AMAK