NO MENOS KU 53 KURISTA TA KUMINSÁ KURSO BÁSIKO DI PRODUKSHON DI PAÑA I MODA I INTRODUKSHON NA INDUSTRIA DI FABRIKASHON ORGANISÁ PA IPE

NO MENOS KU 53 KURISTA TA KUMINSÁ KURSO BÁSIKO DI PRODUKSHON DI PAÑA I MODA
I INTRODUKSHON NA INDUSTRIA DI FABRIKASHON ORGANISÁ PA IPE

Willemstad- 17 di Febrüari 2021- No menos ku 53 kursista a kuminsá un kurso básiko di produkshon di paña, moda i introdukshon na industria di fabrikashon organisá pa Institute for Professional Excellence (IPE). E kurso ta keda duná pa D’Loran kende ta un instruktor lokal versá riba e tereno aki.  Minister enkargá ku Desaroyo Ekonómiko dr. Steven Martina i Minister enkargá ku Tráfiko Transporte, i Planifikashon Urbano, Sra. Zita Jesus-Leito a realisá e apertura di e kurso aki.  E kursistanan durante di e próksimo dos lunanan lo siña kon atendé kosementu di p.e. unifòrm, i lo keda introdusí na produkshon básiko di paña i moda pa asina ora nan kaba nan por sea traha den un empresa ku e habilidatnan nesesario òf kuminsá nan propio empresa.  IPE di e forma aki ta kontribuí un biaha mas na prepará nos hendenan pa un fishi ku nos komunidat tin gran mester di dje i ku ta duna nan un perspektiva real pa awe i futuro.

E kurso básiko di produkshon di paña i moda i introdukshon na industria di fabrikashon ta pas den nos esfuersonan pa krea un nashon sabí, esta un ‘smart nation’, kaminda entre otro teknologia modèrnu ta brinda e oportunidat pa mehorá kalidat di profeshonalnan, pero tambe ta hasi uso di oportunidatnan ku desaroyo den mundu ta ofresé.  Den e kaso spesífiko aki ta duna nos mes hendenan e konosementu riba tereno di kosementu, moda i komersio, di tal forma ku nos mes por produsí por ehèmpel unifòrmnan lokalmente kual ta baha importashon i krea trabou pa profeshonalnan lokal.  Sr. Franklin Sluis, Presidente di IPE, a indiká ku no ta intenshon di duna e konosementu so na e kursistanan pero ku IPE lo guia e kursistanan, unabes nan finalisá e formashon, pa nan por drenta produkshon.

Minister Martina den su introdukshon a bisa ku e ta mira den e kursistanan diferente kara di futuro empresarionan, ku yen di smak pa siña i haña e konosementu, pa despues tuma e kurashi i lanta nan propio negoshi.  Negoshinan ku a bira grandi awe a kuminsá chikí un dia.  P’esei Ministerio di Desaroyo Ekonómiko tin henter un komunidat di MiNegoshi kla pará pa yuda e futuro empresarionan ora nan kaba ku nan preparashon i a disidí pa tuma e paso pa lanta nan mes negoshi.

Minister Jesus-Leito, promé ku duna apertura na e kurso, a bisa ku sea ta pa bo drenta den empleo serka un doño di trabou, òf pa bo mes kuminsá bo negoshi: e kursonan aki ta yuda krea perspektiva nobo pa e kursista.  Esaki no ta e promé ni e último área di formashon ku IPE lo duna un aporte na dje.  Kòrsou por sigui konta ku e tipo di kursonan pa formashon aki, ku ta duna kada partisipante e oportunidat pa e mes krea su futuro briante.