Gobièrnu ta hasi un análisis profundo tokante ‘duurtetoeslag’

 

Gobièrnu ta hasi un análisis profundo tokante ‘duurtetoeslag’

Geplaatst op 18 February 2021 dor di Ministerio Asuntunan General i Promé Minister

WILLEMSTAD – Un investigashon ekstenso i minusioso ta andando promé ku Gobièrnu por tuma un posishon tokante di e ‘duurtetoeslag’.  Esaki ta loke Gobièrnu di Kòrsou a renegoshá ku Hulanda basá riba e ‘landspakket’ ku a akordá. Riba 31 di mart 2021, Hulanda lo duna su reakshon riba e análisis ku lo ser entregá dia 28 di febrüari benidero.

Na momentu ku Kòrsou i Hulanda a bai di akuerdo ku e ‘landspakket’ riba 2 di novèmber 2020 komo parti di e sosten finansiero, a akordá pa bin ku reforma i desaroyo di proyekto den diferente sektor di nos ekonomia. Esaki tambe ta konta pa vários área di akshon riba tereno di gobernashon. Un parti esensial di esaki ta bahamentu di e gastunan i fortifikashon di e aparato públiko. Bou di e punto akí tambe ta bin dilanti e aspekto di ‘duurtetoeslag’ pa penshonadonan i kon posibel revishon di e maneho di esaki mester yuda kontribuí na redukshon di e gastunan den e aparato públiko.

‘Duurtetoeslag’ ta un porsentahe ku ta risibí adishonal riba bo penshun pa esnan ku a drenta den servisio di Gobièrnu promé ku 1998. Entrante 2016 a hasi kambionan den e areglo pa asina kontené e subida di ‘duurtetoeslag’. E análisis profundo ku Gobièrnu ta ehekutando awor mester demostrá i finalmente determiná, si realmente ta nesesario pa tuma pasonan adishonal pa sigui redusí gastunan di ‘duurtetoeslag’ manera proponé den e ‘landspakket’.

Gobièrnu a tene dia 17 di febrüari último un seshon informativo ku 3 representante di ABVO i lo kontinuá su seshonnan informativo ku diferente stakeholder den e siman benidero, kaminda partisipantenan lo risibí informashon detayá tokante e ‘landspakket’ i por haña aklarashon riba diferente punto a base di preguntanan ku bini dilanti.

Gobièrnu, manera el a bin ta hasi for di komienso, lo sigui informá komunidat riba tur desaroyo tokante e trayekto “Un Etapa Nobo” pa yega na reforma i desaroyo duradero di Kòrsou. Pa esaki por sigui tur kanal ofisial di Gobièrnu di Kòrsou.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: