Servisio di Atmishon ta prepará pa inisiá trayekto di Integrashon Responsabel

 

Servisio di Atmishon ta prepará pa inisiá trayekto di Integrashon Responsabel

Geplaatst op 21 February 2021 dor di Ministerio Hustisia

Willemstad – Manera ta konosí, Minister di Hustisia resientemente a anunsiá ku lo bini un trayekto di Integrashon Responsabel pa sierto personanan ku aktualmente ta permanesé di forma indokumentá den nos pais. Konhuntamente ku Servisio di Atmishon, e titular di Hustisia, ta den preparashon pa lansa e trayekto aki.

Na aña 2020 Minister di Hustisia, huntu ku diferente departamentu di gobièrnu, a hasi un análisis ekstenso pa determiná kon ta e mihó forma pa atendé ku e grupo di persona indokumentá den nos pais. Loke a aselerá e proseso ku a kondusí na e trayekto di Integrashon Responsabel aki, ta e pandemia Covid-19.

Apesar ku promé ku e pandemia a kuminsá ya kaba tabatin personanan indokumentá riba nos isla, dor di e pandemia a yega un momentu ku no tabatin buelo regular mas entre Kòrsou i paisnan den nos region. Pa e motibu aki pa largu tempu no por a deportá e personanan aki mas pa nan pais di orígen. Den sierto kaso, no ta(bata) konosí tampoko unda e personanan aki ta(bata) keda. Loke sí ta konosí ta, ku e grupo aki ta konsistí, pa gran parti di personanan ku ta laborando na Kòrsou.

Banda di e motibunan humanitario relashoná ku e pandemia, un di e konsiderashonnan pa ku e trayekto aki, ta e echo ku Pais Kòrsou lo por bai benefisiá di kontribushon den kaha di gobièrnu pa medio di pago di impuesto i prima sosial, na momentu ku integrá e personanan aki den nos komunidat.

Den e trayekto aki, lo konsiderá únikamente personanan ku a drenta Kòrsou di forma legal, ku entretantu ta indokumentá pero ku aktualmente ta kumpli ku tur rekisito vigente pa por permanesé na Kòrsou. Ademas, nan mester a drenta Kòrsou promé ku 13 di mart 2020, fecha riba kua Gobièrnu di Kòrsou a anunsiá su promé medidanan pa evitá plamamentu di COVID-19.

Ounke ya a hasi menshon di e trayekto di Integrashon Responsabel, e no a inisiá ainda i na e momentunan aki ta hasiendo tur trámite nesesario pa por kuminsá kuné. E servisio di gobièrnu ku lo ta enkargá ku e trayekto konserní, ta Servisio di Atmishon. Na momento ku e trayekto inisiá, personanan ku ta kalifiká, por kuminsá apliká.

Minister di Hustisia lo notifiká esaki, asina ku e drenta na vigor i ta hasi apelashon riba tur persona pa miéntras tantu ta indulgente i warda riba su instrukshonnan, promé ku aserká Servisio di Atmishon pa mas informashon.

Ta bon pa reiterá ku e trayekto di Integrashon Responsabel ta konta pa personanan ku a drenta pais Kòrsou di forma legal promé ku 13 di mart 2020 i ku apesar ku nan por ta indokumentá aktualmente, ta kumpli ku tur rekisito vigente pa permanesé na Kòrsou. Komunidat en general por spera mas informashon pronto.

This site uses Akismet to reduce spam. Learn how your comment data is processed.

error: Content is protected !!
%d bloggers like this: