Minister Dangui Oduber tambe a haya su vacuna contra COVID-19

Minister Dangui Oduber tambe a haya su vacuna contra COVID-19

ORANJESTAD – Despues di un siman exitoso tras di lomba caminda a vacuna mas di 1000 persona cu ta traha den cuido, un siman nobo y importante a habri. Dialuna trempan a cuminsa e vacunacion di esnan mas vulnerable, e grupo di riesgo den nos comunidad, esta e grupo di 60+. Desde oranan di mainta Minister di Salubridad Publico Sr. Dangui Oduber conhuntamente cu Minister President Sra. Evelyn Wever Croes a bishita 2 localidad cu ta duna e vacuna esta Santa Teresita Center na San Nicolas y Centro Deportivo Libertador Betico Croes na Santa Cruz.

Di prome dia cu anuncia na e comunidad cu Aruba lo haya e vacunanan pa combati COVID-19, Minister Oduber a vocifera cu su persona lo tuma esaki. A traha un programa di ehecucion di vacunacion pa tur cos cana bon segun e plan. Actualmente tin mas di 13 mil hende cu a registra pa haya e vacuna di cual 5 mil ta personanan riba 60 aña di edad. Minister Dangui Oduber ta keda haci yamada na comunidad pa registra pa haya e vacuna via e Aruba Health App of na un di e 4 MFA cu tin rond nos isla. Tambe ta pidi pa familiar yuda nan famia di mas edad pa registra via e Aruba Health App.

Despues cu varios persona den nos comunidad a puntra ki dia e mandatarionan ta vacuna, dialuna atardi Ministernan di Gabinete Wever Croes a presenta na Centro Deportivo Libertador Betico Croes na Santa Cruz pa haya nan vacuna. Esaki despues cu a dicidi den Conseho di Minister. Minister Dangui Oduber ta spera cu esaki lo trece mas confiansa den comunidad pa bay vacuna. Minister Oduber a enfatisa cu esaki ta pa den union nos vence e pandemia aki pa asina crea e immunidad di grupo. Di e manera aki nos dushi Aruba por bay bek na e normalidad.

Minister Dangui Oduber a menciona cu e ta yena di emocion ora di mira e sonrisa y e alegria riba cara di nos grandinan ora nan haya nan vacuna.

Ban sigui vacuna Aruba, ban scapa bida y ban prospera.