Minister Xiomara Maduro: “Ami a Vacuna, pa proteha mi mes y mi famia y pa crea inmunidad den comunidad, cu ta necesario pa nos por recupera nos Economia.” Ban haci uso di e oportunidad cu Aruba tin pa vacuna pa por recupera nos economia

Minister Xiomara Maduro:

“Ami a Vacuna, pa proteha mi mes y mi famia y pa crea inmunidad den comunidad, cu ta necesario pa nos por recupera nos Economia.”

Ban haci uso di e oportunidad cu Aruba tin pa vacuna pa por recupera nos economia

 

ORANJESTAD – Dialuna atardi Minister Xiomara Maduro hunto cu Minister President Evelyn Wever-Croes y Minister Dangui Oduber a tuma e vacuna contra COVID19. Tin hopi hende cu ta duda ainda pa tuma e vacuna y cu kier a mira e gobernantenan di nos Pais mustra liderato y tuma e vacuna prome pa duna e bon ehempel. Cu e responsabilidad aki den mente, Minister Maduro hunto cu colega Ministernan President y Salubridad a tuma e vacuna. Minister Maduro ta haya cu e proceso di vacuna a bay hopi lihe, na un manera profesional y no ta haci dolor. E mandatario no a sinti ningun malestar tampoco despues di a tuma e vacuna. Minister Maduro ta enfatisa cu no ta tur pais tin e posibilidad cu Aruba tin pa recupera nos economia, pesey ban haci bon uso di e oportunidad aki.

 

Un invitacion pa ta parti di e solucion

Pa Aruba por reactiva su economia ta importante pa nos ricibi mas turista ya cu turismo ta locual ta move e economia di nos Pais. Si Aruba no logra baha e casonan di infeccion, turista no lo yega nos Pais cu consecuencia grandi pa nos economia. Pa libra nos di COVID19 nos tin e oportunidad pa crea e inmunidad necesario door di vacuna. Gobierno di Aruba a percura pa nos haya e vacuna via Hulanda y a prepara un bon plan y infrastructura pa por brinda e vacuna aki na tur hende cu ta desea di haya esaki. Banda di cuida nos salud, sigui e reglanan di bon higiena, tene distancia, e vacuna ta forma parti di e solucion pa nos por recupera e economia di nos Pais. Pa e motibo aki Minister Xiomara Maduro ta haci un invitacion pa tur hende cu kier ta parti di e solucion pa yuda economia di Aruba, pa registra via e Health App di DVG pa asina por traha e cita necesario pa haya e vacuna.

 

No ta tur Pais tin e posibilidad di vacuna ainda

Aña pasa ful mundo tabata anhela pa por haya un vacuna pa stop COVID19. Awor e vacuna a yega Aruba y Gobierno di Aruba di su banda mesora a percura pa un plan pa registra y brinda e vacuna na un manera profesional y lihe. No ta tur Pais ta den e posicion cu Aruba ta awor aki. E siman aki mes IMF a informa Minister Maduro cu e hecho cu Aruba a haya e posibilidad pa vacuna y tin un capacidad grandi pa test, ta puntonan positivo den e resultado di Aruba su evaluacion financiero y economico y ta distingui nos di otro Paisnan den Caribe. 

 

E solucion ta den nos man

Minister Xiomara Maduro ta efatisa cu su persona ta vacuna pa duna e bon ehempel, pa proteha su mes y su famia y pa crea inmunidad den comunidad, cu ta necesario pa nos por recupera nos Economia. E mandatario encarga cu economia ta encurasha nos comunidad pa ban haci bon uso di e oportunidad aki pa recupera, keda saludabel y reactiva economia di Aruba. Un danki ta bay na colega Minister di Salud Dangui Oduber, DVG y full e team pa e excelente trabou na bienestar di Aruba. E solucion ta den nos man.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: