VISHON: ’27 Mion pa deporte’

VISHON: ’27 Mion pa deporte’

 

Willemstad 24 Febrüari 2021 – Kambia e roster aktual di skol pa un roster nashonal kaminda deporte i arte ta haña un ròl mas próminente. Esaki, i tambe kon pa realmente finansiá e plan, a keda presentá dor di Vishonario Jedrek Magdalena durante su presentashon na Sentro Vishonario, kaminda e la enfoká prinsipalmente riba deporte. “Ounke ku e strukturanan aktual ta minimal, nos talentonan a sa di sobresalí komo profeshonalnan lokal i internashonal. E momentu a yega pa invertí den formashon mas ámplio ku lo benefisiá tantu nos hubentut komo nos país”, Jedrek Magdalena ta indiká.

Regularmente VISHON ta transmití presentashonnan live pa medio di página di Facebook di VISHON, kaminda Vishonarionan ta bai mas profundo den e vishon di e partido pa loke ta trata desaroyonan den e areanan di enseñansa, ekonomia i bienestar sosial. Jedrek Magdalena, konosí den e mundu di deporte komo profeshonal lokal i internashonal i komo presidente di Federashon di Baseball di Kòrsou, tambe a kompartí e pensamentu di VISHON pa loke ta trata deporte. “Finalmente nos ophetivo ta pa duna deporte e prioridat ku e meresé, mirando e ròl importante ku esaki por tin en general den desaroyo individual  di kada un di nos”. Durante e presentashon varios punto a bin dilanti ku ya pa algun aña sa trese dilanti den plan di konseho pa desaroyo, entre otro nos fasilidatnan deportivo ku mester di atenshon, un manera struktural pa atendé i subsidiá tur nos federashonan deportivo na mesun nivel, involukrashon di deporte den nos sistema edukashonal i tambe deporte na nivel profeshonal riba nos isla (A-Status).

E pregunta kardinal, pues ‘kon lo yega na fondo pa e plan aki’, tambe a keda kontestá. A menshona diferente forma ku huntu lo generá 27Mion pa por kumpli ku e plan. Formatonan manera un sistema di “sugar tax” i retene un porsentahe for di gasolin, akompañá pa invershon di liganan profeshonal internashonal i finalmente dor di posibel adaptashon di enseñansa liber.

Deporte por generá entrada i por asta ta un sektor ku por kontribuí na nos ekonomia, generando varios kupo di trabou. Tambe deporte tin un influensia positivo riba formashon di kada persona, kombiná ku e benefisionan pa salubridat i tambe nos sistema hudisial.

Algu ku sigur a hala hopi atenshon dor di e siguidonan riba facebook ta e sistema ku ke inkorporá deporte den e sistema edukashonal. Dunando studiante opshon pa skohe dos deporte pa praktiká durante kada aña eskolar, kuminsando den grupo tres te ku e di dos aña eskolar di estudio avansá. Despues di esei kada studiante mester skohe entre deporte pa sigui praktiká.

Tambe e parti di deportista profeshonal (A-Status) kaminda 50 atleta repartí den diferente federashon deportivo lo risibí un pago mensual di ANG 2300,- pa praktiká nan deporte i representá Kòrsou na nivel internashonal teniendo na kuenta si ku nan mester kumpli ku sierto eksigensia.

“A yega ora pa deporte tambe bira un prioridat mirando ku ta benefisio so nos por tin di dje den diferente area. Nos tur semper ta konsiente di kuantu kos por logra via deporte i arte, pues awor ta e momentu pa demonstrá esei”, asina Vishonario Magdalena a indiká.

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: