PAR: Petishon Komishon Sentral: Deliberashon riba e relashon entre desempleo na Kòrsou i esnan indokumentá laborando den sektor gris (ku no ta duna un aporte na ekonomia di Kòrsou).

 

Presidente di Parlamento

Sra. America Francisca

Wilhelminaplein #4

Presente

 

Kòrsou, 3 Aprel 2023

 

Tópiko:  Deliberashon riba e relashon entre desempleo na Kòrsou i esnan indokumentá laborando den sektor gris (ku no ta duna un aporte na ekonomia di Kòrsou).

 

Desempleo aki na Kòrsou ta un di e problemanan di mas grandi ku tin.  Segun sifranan disponibel di nos ofisina di statistik di aña 2020; 70.500 persona ta kapas pa por traha pero ta un total di 57.050 persona so ta trahando. Esaki ta nifiká ku di kada 10 persona ku por traha 2 no ta trahando.

 

Sinembargo tambe tin hopi  persona ku ta traha na un manera ilegal, indokumentá riba nos isla. Esaki a wòrdu trese dilanti resientemente dor di un  siudadano preokupá ku  asta for di Oropa tin trahadónan  ta yega Kòrsou, riba invitashon di dunadó di trabou pa bin traha aki den konstrukshon. Tambe a konstatá ku banda di personanan for di Oropa, tin personanan di paisnan  latino amerikano i di Karibe ku ta  yega aki i traha libremente .

 

Un otro fenómeno ta e grupo ku ta laborando den e sektor gris. E grupo den e sektor aki no ta registrá niun kaminda komo trahadó ni komo negoshante i konsekuentemente no ta kontribuyendo na kaha di gobièrnu, i na nos komunidat.

 

Gobièrnu di Kòrsou a tuma komo prioridat pa traha riba e Meta  di Desaroyo den liña di Nashonnan Uni (SDG). Meta  di Desaroyo 8(SDG8) ta pa promové  trabou desente  den  komunidat i  ekonomia. Nos ta un pais ku ta konsistí di mas o ménos 150.000 persona. Mirando ku ta 57.050 persona so ta trahando  legalmente, esaki ta nifiká ku ta mas òf ménos  40% di nos poblashon ta traha i kontribuí na nos ekonomia dor di  paga primanan sosial manera  penshun di behes i  gastunan di malesa. Kuater (4) persona ta traha pa dies (10) por kome.
E sifranan i informashon aki ta importante pa gobièrnu diseñá un maneho dirigí pa subi e kantidat di kupo di trabou, krea kapasidatnan/kondishon serka desempleadonan pa nan por bini na remarke pa un empleo i alabes atendé ku esnan ku ta traha pero no ta kontribuyendo pasobra nan ta indokumentá òf no ta registrá (sektor gris).

 

Pa medio di esaki i hasiendo uso di artíkulo 33 di nos Reglamento di Òrdu Frakshon di PAR ta pidi sra. Presidente pa yama un reunion di komishon sentral ku e tópiko: Deliberashon riba e problemátika di desempleo na Kòrsou pa loke ta trata esnan indokumentá i den sektor gris sin duna un aporte na ekonomia di Kòrsou.” Ademas nos ta pidi presensia di minister di SOAW sra Larmonie-Cecilia i Minister di Ekonomia (MEO) sr Cijntje.

 

 

 

Danki di antemano,

 

Frakshon di PAR

 

Zita Jesus Leito MBA                                                                                       Quincy Girigorie

 

Ana Maria Pauletta                                                                                         Steven Croes