Prome Minister Evelyn Wever-Croes: UPDATE DI E DESAROYO DI COVID-19  A mira desaroyonan riba cierto area hopi positivo den e luna di februari

 

Prome Minister Evelyn Wever-Croes:

 

UPDATE DI E DESAROYO DI COVID-19 

A mira desaroyonan riba cierto area hopi positivo den e luna di februari

 

Diahuebs mainta den conferencia di prensa di Gobierno di Aruba, Prome Minister Evelyn Wever-Croes a elabora riba e desaroyo di Covid-19 pa luna di February 2021. Segun Premier Wever-Croes a declara, e luna di february tabata uno na unda a mira desaroyonan riba cierto area hopi positivo. 

 

A cuminsa luna di februari cu un total di 334 caso activo cu a baha te cu ayera casi na mitar pa un total di 174 caso. Pa loke ta trata residentenan na comienso di februari tabata na 314 y awe e total ta na 141. Averahe di casonan nobo pa dia tambe a baha di un total di 35 caso pa dia na un averahe di 28 caso pa dia.

 

Loke si a resalta den e cifranan ta cu e total di fayecidonan a causa di Covid-19 pa luna di februari tabata halto den comparacion cu e lunanan anterior. E unico biaha cu e cifra di fayecido tabata halto tabata na september 2020 na unda a registra un total di 17 morto. februari 2021 ta conta cu un total di 13 morto. 

 

E luna di Maart a caba di cuminsa y ya a conoce 2 fayecido pa causa di Covid-19. Gobierno di Aruba ta manda palabranan di condolencia na e famianan di e fayecidonan. 

 

E situacion na hospital ta uno preocupante mirando cu e cifranan di personanan hospitalisa pa motibo di Covid-19 ta aumentando. Februari a cuminsa cu un total di 19 persona hospitalisa y awe tin un total di 27 persona den hospital. Den ICU tin un total di 10 persona. Esakinan ta cifranan sigur hopi preocupante mirando e capacidad cu tin na hospital pa atende cu personanan cu ta contagia cu Covid. 

 

Gobierno di Aruba tambe a ser notifica cu a bin un total di 7 caso nobo di e variante Ingles. Esaki ta pone cu Aruba a conoce un total te cu awe di 21 caso di e variante aki. Apesar cu e personanan aki a recupera caba, mester sigui ta alerta y cuida ya cu ta mustra cu e presencia di e variante Ingles no ta bayendo sino ta aumentando. 

 

Na february Aruba a cuminsa cu e vacuna contra e virus di Covid-19 cual sigur ta duna comunidad un speransa den e lucha contra e virus aki. Ma di 24 mil persona a registra pa tuma e vacuna cual sigur ta un cantidad hopi bunita y ta mustra cu comunidad ta tuma e vacuna aki na serio. E cifra aki tambe ta duna un imagen positivo pa cu e sistema di gobierno di procesa registracion  

 

Te cu diaranson nochi un total di 8,882 perosna a ser vacuna cu ta un cantidad satisfactorio. 

Na e momentonan aki ainda e focus ta pa vacuna esnan di un edad di 60 aña of mas. Di e 24 mil personanan cu a registra 10 mil ta riba e edad di 60 aña. Gobierno hunto cu e team di crisis lo bay cuminsa cu un campaña agresivo pa purba logra haña mas persona den e grupo aki pa registra ya cu pa regla di Hulanda mester vacuna e grupo aki prome cu por sigui pa e siguiente gruponan. Di e total di 8,882 persona cu a vacuna, 7,300 persona ta riba e edad di 60 aña y e resto ta “verzorgspersoneel”.

 

Te cu awe tin un poco mas di 3,000 vacuna pa administra. Otro siman e di dos shot ta yegado Aruba y lo wordo suminstra. 

 

Gobierno di Aruba ta haci un apelacion na comunidad pa porfabor registra pa e vacuna. E vacuna aki ta yuda esnan cu contagia cu e virus pa no haña sintomanan severo y lo mester wordo hospitalisa. Un apelacion especial na esnan di edad mas halto y cu ta sufri di un of otro malesa cronico manera presion halto, problemanan cardio vascular of problema cu riñon. E personanan aki ta esnan mas vulnerabel y cu por haña sintomanan severo y fatal. 

 

Gobierno di Aruba ta gradici tur esnan cu a registra pa e vacuna, esnan cu a tuma e vacuna y un danki na e ekipo cu ta trahando duro na e 3 localidadnan pa nan compromiso pa cu e desaroyo di pais Aruba. 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: