Sentro di Korekshon Kòrsou ta fèrf vèlt di Jong Holland

Sentro di Korekshon Kòrsou ta fèrf vèlt di Jong Holland

WILLEMSTAD – Djaluna siman pasá a kuminsá ku mantenshon na Vèlt di Jong Holland na Mundo Nobo. E trabou ta tuma lugá den estrecho koperashon ku Sentro di Korekshon Kòrsou (SDKK). Den e dianan binidero algun kliente di SDKK ta bai fèrf e muraya rònt di e vèlt i tambe e kasita. 

Na inisio di e trabounan, Minister di Enseñansa, Siensa, Kultura i Deporte, sr. Steven Croes, a hasi un bishita na e vèlt di Jong Holland pa e mes kòmbersá ku e klientenan i direktiva pa haña un mihó bista di kiko tur e mantenshon ta enserá. Tambe ela keda informa kon e klientenan ta bai hasi e trabou i kiko tabata nan motivashon pa partisipá den e trabou aki. A resultá ku tur ta personanan ku un amor grandi pa deporte. Den kombersashon ku e klientenan minister a deliberá riba e importansia pa tantu vèltnan di deporte komo skolnan ta den bon estado di mantenshon pa desaroyo di nos yunan. Segun e mandatario deporte ta hunga un papel importante pa siña hòbennan nos norma i balornan for di chikí. Deporte ta un vehíkulo importante tambe pa desaroyá disiplina propio, algu ku kada hòben tin mester pa e por logra su metanan den bida i keda riba e bon kaminda. Pesei mes e ta aploudí i ta sumamente kontentu ku di e forma aki SDKK ta duna su klientenan un oportunidat pa nan apòrtá na komunidat i desaroyo di deporte. “Ora ku boso kaba ku e trabou aki un par di siman, mi lo reta boso pa un wega di futbòl i pusta pa un kaha di Gatorade”, Minister Croes a deklará na final di su bishita, algu ku sigur tantu SDKK komo e klientenan lo kòrdé riba dje asina e trabou ta kla.