Roelly Winklaar famoso bodybuilder a hasi minister Koeiman un bishita di kortesia

Roelly Winklaar famoso bodybuilder a hasi minister Koeiman un bishita di kortesia

Geplaatst op 09 March 2021 dor di Ministerio Desaroyo Sosial, Labor i Bienestar

Willemstad – E gran deportista di renombre internashonal, Sr. Roelly Winklaar a bishitá minister Koeiman i entre otro a kompartí su deseo di mira Kòrsou duna hopi mas atenshon na un desaroyo mas diversifiká pa loke ta trata deporte pa nos hóbennan lokal.

Sr. Winklaar i minister Koeiman tin kontakto regular i ta konosí ku minister tin un interes personal den deporte komo medio importante pa por stimulá nos hóbennan sali dilanti. Tabata un lùnch ameno i huntu ku Roelly su partner a elaborá riba e kultura di bodybuilding i posibilidatnan pa duna workshop inspirativo pa krea oportunidat i vishon pa bolbe trese hóbennan desviá bèk riba bon kaminda.
Roelly a enfrentá un momentu sumamente difísil den fin di aña, ora nèt promé ku e mester a partisipá na kampionato di mr Olimpia, kua ta torneo di mas renombrá i importante den mundu di bodybuilding, a bin resultá ku el a kontagiá ku Covid durante un stòp-over na Turkia.

Roelly ta sigui di ta sumamente motivá pa bai p’e próksimo reto i ta sinti ku e tin hopi di logra ainda komo deportista realmente dediká, disipliná i determiná. Roelly ta internashonalmente konosí komo e “gigante simpátiko” i tur kaminda ku e biaha bai pa kompetí òf trein den gym, semper fanátikonan rònt mundu ta keda pidi pa por saka sèlfi ku ne.

Roelly a bai biba Hulanda for di su tres aña pero ta karga Kòrsou fielmente na su pechu enorme i p’esei el a bin biba Kòrsou bèk i ku hopi pashon ta kompetí representando su pais natal Kòrsou.
Nos por ta sumamente orguyoso di un deportista di e nivel aki ku ta keda humilde i ta stima su pais.

This site uses Akismet to reduce spam. Learn how your comment data is processed.

error: Content is protected !!
%d bloggers like this: