Barku di bela den problema

E team di Rescue & Coordination Center (RCC) di wardakosta  a risibi un melding ayera nochi den kareda 19:44 atrabes di e VHF-kanaal 16 di un barku di bela den nesesidat den besindario di Boneiru.

E team di RCC a kontakta Dash avion di patruya mesora, pa nan bai na e luga menshona.

Ora nan a yega na e sitio, Dash a ripara ku e barku di bela na nort di Lac Baai a bai dal kontra e barankanan.

Tabata tin 1 persona na kantu i 3 persona abordo di e barku.

Mientras tantu e team di RCC a tuma kontakto ku Polis (KPCN) i koninklijke Marechaussee (KMAR) i informanan tokante di e situashon i nan tur dos a manda un patruya na e sitio. Tambe AW 139 e helikopter di wardakosta tabata para kla pa duna asistensha. Al final nan yudansa no tabata nesesario paso e kuerpo polisial mes tabata  tin e situashon bou di kontrol i e personan tabata kolektando nan pertenesianan for di e barku di bela. Atrobe tabata un bon trabou di search & rescue den koperashon ku e instanshanan di servisio na Boneiru.