KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

NOTISIA

IGLESIA NOBO E KELKI ENTRANTE MEI LO KASA PARAHENAN DI TUR ORIENTASHON DEN MISA

 

IGLESIA NOBO E KELKI ENTRANTE MEI LO KASA PARAHENAN DI TUR ORIENTASHON DEN MISA

Curacao, 15 Februari, 2021 — Entrante mei proksimo lo bira posibel pa kasa den misa Kristian na Korsou sin importá orientashon dje pareha. Esei ke men ku banda di Parehanan di hòmber i muhé, parehanan di mesun sekso tambe lo por kasa den misa na Korsou. Esei lo bira posibel ku yegada dje promé Komunidat di Iglesia Kristian Progresivo-Liberal den istoria di Korsou i e parti Karibense di Reino Hulandes. E Komunidat religioso nobo lo yama Union di Iglesia Unitariano Universalista Kristian Metropolitano, UN KELKI. E Iglesia lo ta basa riba un lektura progresivo di Evangelio i Beibel den tradishon di e asina yama teologia di liberashon, ku ta boga pa emansipashon di hende pober i solidaridat ku minoria diskrimina den sosiedat.

E iglesia lo keda dirigi pa tres pastor forma den diferente tradishon kristian, di kua unu a hanja su preparashon den un seminario katoliko pa hopi aña. E iglesia lo no ta basá riba e prinsipio di pastor pagá, sino ku e komunidat di kreyente mes huntu ku e pastor ta prepara kada sirbishi, kaminda tur miembro tin mesun bos. Pesei e titulo ku e Pastornan ku preparashon religioso lo karga den e iglesia nobo ta unu humilde di ‘Konsehal’. E iglesia nobo ta rechasa e praktika di pastor ku ta depende pa nan entrada di e komunidat di kreyente i asta hopi biaha ta akumula rikesa riba lomba di nan komunidat. Pesei na Iglesia Un Kelki lo no tin mester di paga di diesmo tampoko. Esnan ku ke por bira miembro dje iglesia i e kontribushon segun nan eskoho lo bai 100 porshento na proyekto di solidaridat ku esnan den nesesidat i gastunan di hur ets pa tene misa, tur kontrola pa e miembronan mes.

Ounke echo ku na e iglesia nobo parehanan dje mesun sekso i di hende transgenero tambe lo por kasa ta algu basta rebolushonario na Korsou, esei lo no ta e enfoke prinsipal dje iglesia, ku ta Hustisia Sosial na Korsou i na mundu, Salbashon di Planeta, i solidaridat ku hende pober i tur hende diskriminá, i ku ta ser trata inhustu na Korsou i na mundu. Pa loke ta matrimonio e iglesia lo tini un ofisina pa parehanan homoseksual, ku ke inskribi nan matrimonio, por regla tur tramite pa kasa na kranshi na Boneiru, tanten ku esei lo no ta posibel na Korsou. Esei en espera di rekonosementu di status legal di e parehanan aki na Korsou mes, sea den forma di matrimonio sivil o komo Union Sivil Registra. E ultimo forma ta unu sostene pa Papa Francisco di Iglesia Katoliko. Un dje konsehalnan dje iglesia nobo lo ta e konosido aktivista pa derechi igual i aseptashon di diversidat seksual na Korsou, Mario Kleinmoedig, ku a haña su preparashon den e tradishon di Teologia di Liberashon, studiando na Universidat na Hulanda na añanan 80 di siglo pasá. E Iglesia ta miembro i representá den direktiva di Caribbean Interfaith Network (CARIN) i Global Interfaith Network (GIN) ku sede na Durban Sur Afrika. Tambe e Iglesia lo ta Asosiá ku e Konseho Internashonal di Iglesianan Unitariano Universalista (ICUU) i e iglesia inklusivo trinitariano Metropolitan Community Church na Merka (MCC) via nan Parokia di Sunshine Cathedral na Florida.

639114718427035"
639114718427035"