Segun Giovanni Atalita # 6 riba Lista di KDNT: KULTURA I DEPORTE MESTER HAÑA MUCHU MAS RESPET DI PARTI DI GOBIERNU NA KÒRSOU

 

Segun Giovanni Atalita # 6 riba Lista di KDNT:

KULTURA I DEPORTE MESTER HAÑA MUCHU MAS RESPET DI PARTI DI GOBIERNU NA KÒRSOU

 

WILLEMSTAD —  Un hende lo no kere, pero e kosnan ku ta uni un pais ta su kultura i deporte. Si di bèrdat nos ta papia di “nation building” e momentu a yega pa nos no solamente pone mas plaka disponibel pa desaroyo den ramonan di kultura i deporte, pero  tambe pa duna i trata esakinan ku mas rèspèt.

Atraves di añanan ku a pasa, por a tuma nota ku Gobièrnunan di Turno a bin ta trata e gremio di kultura i deporte komo un apèndiks, o sea ta bini na remarke pa fondonan pa por sigui desaroyá komo e último rekurso na momentu ku sobra plaka.

Nos den Kòrsou di Nos Tur ta mira esaki otro, pasombra ta hustamente kultura i deporte ta e parti ku ta trese felisidat den e pueblo aki. Ku e parti kultura nos ta referí tantu na es aspekto  di nos músika lokal, pero tambe farándula.

Hopi hende lo no kere, pero tin masha hopi hende lokal ku ta saka nan dia den farándula. Farándula no ta solamente toka na un fiesta, pero di komponé, areglá i te hasta hasi uso di studionan di grabashon pa asina ei por pone produkshonnan di interes riba merkado.

Dediká tempu na algu ku ta trese alegria serka otro nan ta un don di Dios i nos mester por tin e sosten di nos Gobièrnu pa por sigui desaroyá esaki. Wak den otro paisnan kon Gobièrnu ta stimulá muchanan for di chikitu pa nan por siña músika. Nos no mester bai muchu leu. Wak p.e. na Venezuela kaminda nan a desaroyá “E Sistema” ku ta unu ku a produsí bon músikonan ku tur aña di nobo ta bin reforsá nos brass den Festival di Tumba.

Banda di músika bo tin deporte, ku ta un elemento importante den trese nos pueblo huntu na momentu ku nos ekipo nashonal, no importá e ramo di deporte, ta representá nos pais den eksterior o aki. No ta pòrnada den paisnan Latino Amerikano nan a yega di usa e ekspreshon di “Hacer Deporte es Hacer Patria”. Ki mas dushi pa komo pais nos por mira nos bandera ta subi bai laria na momentu ku nos a gana.

Aki tambe Gobièrnu tin un ròl importante. Un ròl pa aloká fondonan pa asina ei nos por tin e mihó preparador i entrenadornan ku mester pasa nan konosementu abou pa nos muchanan. Hende lo no kere pero den deporte na mucha, Kòrsou ta sobresalí, pero asina ku  e mesun muchanan aki hasi 16 aña pa asina, nos nivel kompetitivo ta bai atras. 

Den e kaso aki ta bon ku di ariba, for di e parti di Gobièrnu mester bini e liña di maneho, pero mas ku tur kos alokashon di fondonan pa asina ei nos por pèrkurá pa tantu kultura i deporte keda bon protehá. Ku Kòrsou di Nos Tur den Gobièrnu, nos lo bai pèrkurá pa esaki bira realidat.

Banda di tur esakinan, tin hinter e asuntu di  Covid 19, kaminda un gran mayoria di esnan ku ta den e mundu di ekspreshon no ta hañando e oportunidat pa por ehersé nan pashon ya ku apesar ku intentonan ta ser hasí pa habri farándula, ta para duru ku esaki ta imposibel, siendo ku nos tur  sa ku por habri esaki na un manera responsabel.

Atentamente

 

Giovanni Atalita

This site uses Akismet to reduce spam. Learn how your comment data is processed.

error: Content is protected !!
%d bloggers like this: