Proyektonan di desaroyo duradero na Kòrsou presentá durante Hawai’i Sustainability Summit 2021
Proyektonan di desaroyo duradero na Kòrsou presentá durante Hawai’i Sustainability Summit 2021
Geplaatst op 15 March 2021 dor di Ministerio Asuntunan General i Promé Minister
WILLEMSTAD – Djabièrnè 5 di mart 2021, Promé Minister Rhuggenaath a partisipá den forma virtual na Hawai’i Sustainability Summit 2021. E mandatario tabata un di e miembronan di e pènel di Island Leadership for a Bright Global Future: Catalyzing Partnerships for the Decade of Action 2030.
E otro miembronan di e pènel tabata e Gobernador di Guam sra. Guerrero, e alkalde di Hawai’i sr. Roth, investigadó di Kohala Institute dr. Crabbe i e direktor ehekutivo di Micronesia Conservation Trust sr. Kostka. Embahador Borges, vise presidente i hefe di United Nations Foundation New York Office a klousurá e evento.
Den su intervenshon Promé Minister a papia tokante e importansia di Sustainable Development Goals (SDG’s) na Kòrsou. E implementashon di SDG tin prioridat pa Gobièrnu. Banda di esei el a pone atenshon riba un kantidat di proyekto na Kòrsou, manera Hòfi Wawuya i The Living Labs. E proyektonan akí ta importante pasobra nan ta yuda pais realisá diferente SDG manera SDG 1: Sin Pobresa, SDG 3: Salubridat i Bienestar Optimal, SDG 4: Enseñansa di Kalidat, SDG 7: Energia Pagabel i Duradero, SDG 8: Kresementu Ekonómiko i Trabou Digno i SDG 14: Bida bou di Awa.