Gobièrnu di Kòrsou ta instalá un komishon pa yega na un salón di fama pa Héroenan Nashonal di Kultura

Gobièrnu di Kòrsou ta instalá un komishon pa yega na un salón di fama pa Héroenan Nashonal di Kultura

 

WILLEMSTAD – Riba djamars 16 di mart 2021, Minister di Enseñansa, Siensia, Kultura i Deporte sr. Steven Croes a instalá e komishon “Rekonosementu Héroenan Nashonal di Kultura”.  E komishon akí ta bai traha riba un proposishon konkreto pa yega na un salón di fama pa nos héroenan riba tereno di kultura. 

 

Gobièrnu di Kòrsou ta haña importante pa identifiká héroenan di kultura i asina rekonosé e personanan akí, komo ku esaki ta duna kontenido na un di e aspirashon nan di nos Maneho di Kultura di Kòrsou ku a keda aprobá dia 30 di sèptèmber 2020 pa Konseho di Minister. Ta trata di entre otro aspirashon nan manera stimulá “Nation Building”, krea mas konsientisashon kultural, enforsá edukashon kultural i stimulá kalidat di arte i kultura. 

 

Durante di un seremonia chikitu, Minister di Enseñansa, Siensia, Kultura i Deporte Sr. Steven Croes a instalá e komishon i a duna nan e enkargo. E komishon ta konsistí di shete (7) miembro, un representante di Sektor Kultura i Deporte, un representante di Sektor Enseñansa i Siensia, un representante di Ministerio di Asuntunan General, un representante di UNESCO, un miembro di Konseho Kultural Kòrsou, Antropólogo Rose Mary Allen i nos artista visual Giovanni Abath. E tareanan konkreto di e komishon ta:

 

  • Definí e terminologia héroenan riba tereno di kultura;
  • Traha riba kriterionan pa por yega na rekonosementu di héroenan riba tereno di kultura i sòru pa Gobièrnu di Kòrsou stipulá esaki via un desishon;
  • Konsipiá un maneho, eventualmente lei i proseduranan pa rekonosementu di  héroenan nashonal di kultura;
  • Krea un struktura pa un Salòn di Fama di Kultura;
  • Krea un proposishon pa un “Dia Nashonal di Arte” den liña di “World Art Day” di UNESCO, kual ta tuma lugá anualmente riba 15 di aprel. 

 

Gobièrnu di Kòrsou ta felisitá e miembronan i ta deseá nan tur klase di éksito ku e tareanan importante akí ku ta kontribuí na edifikashon di nos nashon ku nos tur ta stima.

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: