Deja’s Icecream

‘DEJA’S Homemade Ice Cream’ ku awor aki ta konta ku mas ku 10 sabor i tur dia kresiendo a habri su negoshi i tin un di e ‘Ice Cream’ nan di mas dushi di Kòrsou! Emely Sebelon a mira ku tin un oportunidat den e pandemia di Covid -19 i a sostené su yu nan ku e idea aki. DEJA’s Homemade Ice Cream, un realidat!

E kos a kuminsá asina aki…. Tabata tin un dia ku mi a bai supermarket, den e temporada di Covid – 19 den Lockdown den mart, mucha no por a drenta supermarket, Daphe-nee ( 16 aña ) i Jean-dy ( 8 aña ) ta traha nan lista pa mi por kumpra nan kosnan i trese kas. Komo nos tur na kas ta stima ‘Ice Cream’, ta mas ku klaro ku riba nan lista tabata tin ‘Ice Cream’ pa kumpra. Grandi tabata mi sorpresa ku ora mi a yega supermarket mi no a haña kasi nada di ‘Ice Cream’ muchu ménos e sabor ku nan tabata ke, asina ta mi no a kumpra nada di ‘Ice Cream’ e dia ei. Jean-dy a bira bisa: “ Dikon nos mes no ta bai traha nos mes ‘Ice Cream’ “ anto ora e la bisa e kos ei, mi a pensa mesora ku ta masha bon idea!

Asina nos a kuminsá buska informashon i awor aki e negoshi ta kana mas mihó ku mi mes a spera.

 Komo mama di Daphe-nee i Jean-dy e kos di mas bunita ta yuda nan hasi e idea aki realidat. Mi mes tin mi ‘Administratie Kantoor’, Jed Kantoor. Spera mi ta siña mi kliente nan ku nan mester rekonosé nan don pa asina nan por tin mas entrada, anto e idea aki tabata algu ku a ‘pop up’ ‘zomaar’ anto ku dedikashon huntu nos ta trahando riba dje. Daphe –nee ta un mucha hopi inteligente, e gusta buska informashon dus hinter e kos di traha ‘Ice Cream’ aki ta algu ku e ta ‘enjoy’ masha hopi mes. E ta un mucha hopi dediká.

Jean – dy ta un ‘Little Miss Curaçao 2020’, gusta partisipá den sertámen, kan kan di kurashi i ta determiná pa ta bon den loke e ta hasi.

E parti ku nos a bringa hopi kuné, tabata pa haña e fórmula perfekto. Nos a traha e ‘Ice Cream’ mas ku 3 biaha sin por a haña esaki manera nos tabata ke. Nos a keda purba ku nos a kuminsá yega serka na e loke nos tur tabata ke i tabata gusta. Nos a haña nos ta bai eduká nos mes kompletu den e parti aki, ku a tuma hopi tempu for di mart 2020 te ku yüli 2020 i tambe nos a pèrdè hopi material, pero nos mester a pèrdè pa awor nos por a gana. Nan tata Dahyr Sebelon tabata kùr e icecream dus tabata duna su krítika pa yega na un bon produkto. Tambe algu ku nos a konfrontá nos mes kuné ta dor ku e ‘Ice Cream’ ta trahá na kas, hopi komersiante no ta aseptá nos produkto wòrdu bendí den nan negoshi. Hopi ta bisa nò pero apesar di esei, nos a kuminsá haña mas i mas petishon pa nos ‘Ice Cream’ anto for di awor nos a kuminsá drenta Toko ku Supermarket. Anto awor nos ta pendiente pa mas kaminda. Awor aki nos ‘Ice Cream’ ta optenibel na Mangusa hyper i Mangusa Supermarket, Bon bini Supermarket , Esperamos Supermarket i Alves Supermarket i tambe diferente Kantina.

Kon boso a bini na e nòmber i kiko boso por konta nos di e DEJA’s Homemade Ice Cream?

E nòmber ta un kombinashon di nan nòmber. Nan a sinta traha riba dje un dia i nan a bin kompartí esaki ku mi. Mi a haña e nòmber ‘cute’ i tambe yamativo. Dimes ros i blou ta nan koló faborito. Nos ta bende e ‘Ice Cream’ aki paso e ta úniko. Kada ‘Ice Cream’ bo ta sinti e fruta den dje. Tur ‘Ice Cream’ ta wòrdu trahá ku fruta natural i ku hopi amor.

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: