Pronto lo tin un área pa por akapará kachónan sin un kas

Pronto lo tin un área pa por akapará kachónan sin un kas

Willemstad – Riba djaluna 15 di mart, Minister Jesus-Leito huntu ku Domeinbeheer i Stichting Dierenbescherming Curaçao a firma un akuerdo pa e organisashon por risibí un tereno ku nan lo manehá, pa por kuida di kachónan ku ta sin un kas. Curaçao Tourist Board (CTB), bou di enkargo di Minister Martina, ta bai invertí den esaki, mirando ku e ta toka nos sektor turístiko tambe. Kachónan ku ta kana riba kayanan sin doño i ku no ta bon kuidá, ta duna un impreshon tristu na esnan ku ta bishita nos pais i ku a kustumbra di trata kachonan di otro forma. 

Den kuadro di e lei nobo pa protekshon di animal ku Parlamento di Kòrsou a aprobá resientemente, e akto aki ta bin nèt na ora. Pronto e trabounan na e tereno lo start pa asina por kuminsa hiba e kachónan sin doño.  Lo sterilisa nan i kuida di nan.  Lo trata tambe pa mas tantu ku ta posibel nan haña un doño ku lo por sigui kuida di nan. 

E logro aki ta unu bunita, i tantu Minister Jesus-Leito komo Minister Martina ta satisfecho ku awor ‘e mihó amigu di hende’ lo por haña un mihó kuido. Tur partner a pone man huntu i palabra ku ta bai traha riba e área aki mas pronto posibel.