Fiansa di 250 mil Doler pa BOPEC
Na: Sr. Gezaghèber E. Rijna
Parke Wilhelmina #1
Kralendijk
Boneiru
Ku kopia pa:
Apresiabel sr. Gezaghèber,
Djaluna último sr Gezaghèber a informá nos den un presidio ku a drenta un petishon pa un fiansa di 250 mil dòler for di e “bewindvoerder” den e kaso di “surséanse van betaling” ku Korte a duna BOPEC.
Gezag a keda di duna nos informashon adishonal durante e siman. Entre tantu nos a tuma nota ku Korte a deklará BOPEC fayit. Kiko esaki ta enserá den e totalidat aki?
Biniendo bèk riba e petishon pa fiansa di 250 mil dòler. Na tur okashon OLB a mantené e posishon di lo no mete den BOPEC, argumentando ku gobièrnu no por mete den un kompania privá. No mester lubidá ku biaha pasá kaba a duna BOPEC un adelanto di un montante semehante sin ku a buska aprobashon di Konseho Insular i sin ku a pone e adelanto aki riba papel ku e kondishonnan bou di kua a duna e adelanto.
Komo miembro di Konseho Insular mi ta atvertí Kolegio Ehekutivo pa no kometé e mesun eror aki. Ta p’esei mi petishon ta pa Kolegio Ehekutivo manda tur dokumentashon detayá ku ta sostené e petishon di e “bewindvoerder/curator” pa Konseho Insular mas pronto posibel.
Tambe mi ta deseá di mira tur e konsehonan di e departamentunan, mui en espesial esun di finansa na Kolegio ehekutivo.
Interesante ta tambe pa sa kon ministerionan di Ulanda, en partikular RWS i ILT ta pensa, pero mas importante ta kon gobièrnu Ulandes ta pensa riba e situashon aki. Al fin al kabo nan ta ko-responsabel pa e debakel ku BOPEC a pasa aden.
Sperando un reakshon rápido di sr. Gezaghèber mi ta terminá.
Atentamente,
_______________________________
Désirée Coffie
Miembro di Konseho Insular di Boneiru