Minister Croes a bishitá un gran baluarte mas di Kòrsou, e konosido ‘Tanta Saida’ 

Minister Croes a bishitá un gran baluarte mas di Kòrsou, e konosido ‘Tanta Saida’ 

 

Willemstad- Dia 7 di mart último, Minister di Enseñansa, Siensia, Kultura i Deporte (ESKD), Steven Croes, a hasi un bishita i kombersá ku señora Saida Hernandez ku a nifiká hopi pa e sektor kultural edukativo na Kòrsou. Di e forma aki Minister Croes ta para ketu nan nos historia i kultura i duna rekonosementu na personanan ku di un òf otro manera a nifiká hopi pa e sektor aki. 

 

Manera ya a bira un kustumber, for di desèmber ku Minister di Enseñansa, Siensia, Kultura i Deporte (ESKD), Steven Croes, a asumí su funshon, e ta dediká parti di su djadumingu pa hasi bishita i kombersá ku baluartenan ku a nifiká hopi pa desaroyo di nos pais. Señora Saida ta un persona hopi konosí den nos komunidat. Ken no ta kòrda e programanan di kushina na TeleCuraçao di Saida ku tur su resetanan dushi? Tambe oranan atardi pa mucha ku Saida.

Den un ambiente masha ameno na su kas, Saida a konta Minister Croes kon ela lanta komo mucha den Otrabanda. Su mayornan a mandé un nijverheidsschool katóliko den Otrabanda, kaminda ela siña kose na mashin, bòrda i asta usa figuurzaag i tambe materianan manera engles i aritmétika i lesamentu. E tempu ei mester a paga banda di schoolgeld tambe sèn pa material ku un alumno usa i dor ku e tabata yuda otro mucha den klas, e tabata kosta su mayornan poko sèn èkstra. Saida tabata gusta lesa, meskos ku su tata, ku tabatin kashi yen di buki na kas.

Ku su 16 aña ela disidí ku e ke bai traha na un pakus den Punda, Liberty. Ela haña un djòp pa reorganisá e deposito. E doño a keda asina enkantá ku su trabou, ku nan a tené na trabou. Ela siña etalá showcase di pakus i a bai sigui hasi esaki tambe despues na Bijenkorf. E tempu ei tabatin kontèst pa drecha showcase i ela gana premio tambe. Despues di e periodo na Bijenkorf ela bai traha na un hotel. Ku 22 aña su mama a mandé bai biba na Venezuela kaminda ela traha den un posishon basta haltu den un hotel na Caracas. Despues di dos aña ela bin ku fakansi i sr. Aitel Hernandez a kontrakté pa TeleCuraçao. Saida a keda Kòrsou i no a bai Venezuela bèk. Su karera na televishon a sigui krese. Ela bai hasi ‘kinderuurtje’ atardi i diferente propaganda. Nan tabata yame “Tanta Saida” i e tabatin un programa “Sita ku Saida” tambe. Despues di algun tempu trahando na TeleCuraçao, su kasa Sr Aitel Hernandez mester a bai biba na Merka pa trabou i nan a biba 6 aña einan. Despues ku ela bini bèk Kòrsou, ela traha kasi 25 aña ku su programa di kushina. Ela produsí sigur 5 buki di reseta. Saida tin masha talento pa pinta. Ta masha hopi pintura Saida a mustra Minister Croes. Pronto Saida ta bai presentá un buki kaminda por mira tur su obranan. 

Pa Minister di Enseñansa, Siensia, Kultura i Deporte (ESKD), Steven Croes, e mainta tabata un eksperensia úniko pa por a kombersá ku un persona talentoso i legendario asina. Ela keda sumamentu kontentu i gradisido pa tantu kos ku Saida a nifiká pa nos komunidat.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: