KUENTA ANUAL 2020 DI BUREAU TELECOMMUNICATIE EN POST, ENTREGÁ NA MINISTER DI VVRP SRA. ZITA JESUS-LEITO

 

KUENTA ANUAL 2020 DI BUREAU TELECOMMUNICATIE EN POST, ENTREGÁ NA MINISTER DI VVRP SRA. ZITA JESUS-LEITO

Willemstad,  6 di Aprel 2021 – Gerensha di Bureau Telecommunicatie & Post (BTP), resientemente reposishoná komo Regulatory Authority of Curaçao, a hasi entrega di su kuenta anual 2020 na Minister enkargá ku Tráfiko, Transporte i Planifikashon Urbano, Sra. Zita Jesus-Leito.  Gerensha i Hunta di Supervishon di e forma aki ta kumpli ku loke ta su deber di raportá konforme loke tin pará den e Ordenansa ku ta reglá pa Bureau Telecommunicatie & Post (P.B. 2006, no.69.). 

E raportahe riba 2020 ta duna un bista bon kla di e trabounan realisá konforme outoridat di BTP, desaroyo di e organisashon i un bista general di e trabounan di regulashon ku a keda realisá den e aña ku ta tras di lomba.  BTP di e forma aki ta kumpli pa di sinku (5) aña tras di otro ku e ordenansa i a hasi entrega di su kuenta na tempu, manera ta su bon kustumber.

 

BTP ta un reguladó ku atraves di tempu a desaroyá den un entidat ku ta regulá multiple sektor, kual ta telekomunikashon, pòst, koriente, awa, kombustibel, tarifanan di aviashon, Caricert i e aña aki tambe a kuminsá ku e proseso pa konsehá Minister tokante di tarifa den sektor di salubridat.  

Ku esaki nos entidat reguladó tin responsabilidat pa regulashon di mas di 35% di nos produkto bruto nashonal.  BTP, dor di regulá i sostené e sektornan aki, ta sostené e maneho di gobièrnu pa garantisá kalidat di e servisio òf produkto ofresé i preisnan pagabel pa e konsumido.  BTP, komo parti di su responsabilidat, tambe ta asumí e ròl di desaroyadó di pensamentu p.e. dor di liderá esfuersonan pa desaroyá Kòrsou den un pais sabí (Smart Nation). Banda di esaki, komo partner ku ta karga ‘Institute for Professional Excellence’ (IPE), BTP ta kontribuí na prepará nos hendenan pa e trabounan di futuro.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: