SOAW ta pidi kliente pa manehá karchinan ku koutela

SOAW ta pidi kliente pa manehá karchinan ku koutela

Geplaatst op 20 April 2021 dor di Ministerio Desaroyo Sosial, Labor i Bienestar

WILLEMSTAD – Ministerio di Desaroyo Sosial, Labor & Bienestar (SOAW) a tuma nota ku diferente karchi di bankomátiko ku e risibidó di ònderstant ta usa i tambe e karchi sosial ku ta keda usá pa kumpra komestibel, sa daña, ta pèrdè òf ta keda gulí pa mashin di bankomátiko.

Segun e proseso konosí, e kliente ta aserká Kas di Bario pa risibí un karchi nobo. Debí na sirkumstansianan nobo di trabou, ligá na medidanan tumá pa evitá mas kontagio di Covid-19, e proseso pa produsí karchi di bankomátiko i karchi sosial no por sosodé ku e rapides ku e kliente ta spera. Konsekuentemente, reprodukshon di karchi nobo por tarda mas largu. Debí na sirkumstansianan menshoná, lo dura mas o ménos 2 pa 3 siman pa SOAW por entregá un karchi nobo. Esaki ya ku Ministerio di SOAW i e organisashonnan envolví tambe ta den e mésun situashon kousá pa Covid-19 pa realisá produkshon di karchi.

Pa evitá mas stagnashon den e proseso pa produsí karchinan nobo, SOAW ta hasi un yamada na tur risibidó di ònderstant i tambe tur persona ku ta usa e karchi sosial, pa nan kuida nan karchi bon i usa esaki konforme prosedura.

Por fabor kuida e karchi kontra daño. Warda e karchi un kaminda ku bo ta haña esaki ora ku bo tin mester di dje. Si akaso bo no ta dominá uso di e mashin di bankomátiko, laga un hende di konfiansa ku mas eksperensia ku bankomátiko yuda.

Kuida e karchi i evitá inkombinensia.