SINDIKATO DOEN *”KOLEGA; NOS ENFOKE TA ABO!”*

SINDIKATO DOEN *”KOLEGA; NOS ENFOKE TA ABO!”*
Un wikènt largu den lockdown ta nos dilanti i pues nos ta bai dediká tempu na nos salú emoshonal i mental. Huntu ku abo kolega nos ta bai perkurá pa empoderá nos mes pa por papia di kontinuidat di enseñansa. “Sea kua sea e dia ku abo, den kuadro di e situashon ku bo ta aden, opta pa bai skol bèk, bo mester sinti bo sigur i bon den bo kueru. Bo mester ta mentalmente trankil, emoshonal i físikamente salú. Sin e kondishonnan akí ta difisil i te asta imposibel pa bo presta manera mester ta!
*Di Kolega pa Kolega!*
Ta den e kuadro akí nos énfasis ta perkurá pa nos mes ku nos mes empoderá otro, apoyá i sostené otro den tur sentido di palabra. Sindikato DOEN a petishon i den koperashon ku koleganan den direktiva, koleganan shopsteward, i koleganan den enseñansa a organisá i hinka e siguiente programa di aktividat den otro komo un bankete pa abo skohe e loke abo ke partisipá na dje. No ta importá ku bo ta miembro di DOEN. “Ku bo ta den enseñansa, bo ta nos kolega i pues e apoyo i sosten akí ta pa abo tambe!”
*Skema di Aktividat pa Henter Vèlt di Enseñansa!*
Nos ta ranka sali wikènt akí ku programanan di radio dediká na vèlt di enseñansa. Siguí pa enkuentronan virtual pa empoderá nos mes riba diferente nivel i tereno.
*Djadumingu 25 di aprel 2021* di 10or di mainta pa 12or di mèrdia na 94.5 FM nos kolega Neetje lo dediká su programa di radio na enseñansa, i ela titul’é ” Enseñansa AWE na Kòrsou!”
*Djaluna 26 di aprel 2021* pa 7or di anochi koleganan Alvaro i Vladimir lo presentá via zoom “Zoom komo instrumento den Enseñansa!”
*Djamars 27 di aprel 2021* pa 7or di anochi koleganan Miesheloe i Mishenou a organisá via zoom un anochi di alabansa dediká na vèlt di enseñansa.
Djarason nos lo presentá un di dos skema di aktividat ku lo kulminá ku lansamentu di nos página web komo aporte i apoyo na un i tur den enseñansa ku lo hasi uso di esaki.
*Sin Nos No Tin Enseñansa!*
Pues kolega perkurá pa bo pas mental, bo salú emoshonal i físiko pasó ta asina so nos lo salbaguardiá banda di salú i bida di nos famia, nos alumno i studiantenan i nan famia, alabes kontinuidat di nos enseñansa.
“Sin nos komo trahadó den enseñansa no tin enseñansa!”
“Pues keda pendiente pa e lenknan pa bo por partisipá na e aktividatnan virtual i kòrda sintonisá wikènt akí e programanan di radio, ariba menshoná, dediká na nos den enseñansa!”
*Direktiva di Sindikato DOEN*
24 di aprel 2021

This site uses Akismet to reduce spam. Learn how your comment data is processed.

error: Content is protected !!
%d bloggers like this: