Preguntanan tokante blokeo pasashi pa bai Rincon dia 30 di aprel 2021
Na Gezaghèber di Entidat Públiko di Boneiru
Parke Wilhelmina #1
Kralendijk
Bonaire C.N
Apresiabel Gezaghèber,
Mi frakshon a tuma nota ku pa Dia di Rincon den promé instante gezaghèber a hasi un apelashon riba komunidat pa no bai Rincon si:
- Bo no ta biba den Rincon.
- Bo no ta traha den Rincon.
- Bo no tin nada di buska o hasi den Rincon.
E apelashon aki komprendiblemente tabata inspirá pa evitá aglomerashon di hende den e bario pa asina supuestamente protehá kontra un posibel brote di e vírus Covid-19 i e variante britániko.
Mi ta konsiente ku debí na e pandemia por tuma medidanan ku ta bai basta leu kontra derechonan fundamental konstitushonal di e hende den un estado di derecho. Un di e medidanan aki por ta limitashon di e derecho di move liber riba nos teritorio, manera tabata e kaso ku toke de keda ora a eskalá e medidanan te na nivel 6.
Sinembargo desde 21 di aprel 2021 a deskalá e medidanan aki te na nivel 4 i kuné a eliminá e medida di toke di keda.
Grandi tabata mi sorpresa ku riba 30 di aprel último, habitante- i bishitantenan a konfrontá ku a blòkia e rutanan pa bai Rincon ku intervenshon di kuerpo polisial. A base di esaki mi ta hasi uso di artíkulo 45 di reglamentu di òrdu pa hasi e siguiente preguntanan, ku e petishon pa haña kontesta oral den e próksimo reunion di Konseho Insular:
- Basa riba kua lei, siendo riba nivel 4, gezaghèber a pidi kuerpo polisial pa no pèrmití ku habitante- i bishitantenan por a drenta Rincon?
- Dikon no a ehekutá i supervisá e medidanan di no aglomerashon den Rincon mes i a stroba nos habitante- i bishitantenan pa asta di no por a dal un paseo ku outo den Rincon i/o bishitá nan relashonnan, manteniendo nan mes na e medidanan publiká?
- Sr. Gezaghèber por splika ku den esaki Sr. Gezaghèber no a surpasá e outoridat ku Sr. Gezaghèber tin a base di nos leinan eksistente i konsiderando derecho di libertat di moveshon di hende?
- Sr. Gezaghèber por splika e prosedura ku a kana pa yega na e desishon i ehekushon den e kaso aki.
En espera di reakshon di parti di Sr. Gezaghèber, mi ta terminá
Atentamente,
___________________________
Désirée E. Coffie
Miembro di Konseho Insular Boneiru
