Temporada di EFO ta kuminsá

 

 

Temporada di EFO ta kuminsá

Geplaatst op 04 May 2021 dor di Ministerio Enseñansa, Siensia, Kultura & Deporte

WILLEMSTAD – Riba djárason 5 di mei 2021 e temporada di Prueba Final di Enseñansa di Fundeshi (EFO) 2021 ta kuminsá pa 1.719 alumno (2019:1.885) na Kòrsou. Sentro di Ekspertisia pa Prueba & Èksamen, un organisashon ehekutivo bou di Ministerio di Enseñansa, Siensia, Kultura i Deporte ta responsabel pa e.o. konstrukshon, produkshon, distribushon i korekshon di e prueba final di Enseñansa di Fundeshi. E aña akí lo ta e di 11 biaha ku e prueba akí ta tuma lugá. E dianan ku e Prueba Final di Enseñansa di Fundeshi ta tuma lugá ta 5 te ku 7 di mei i 11 i 12 di mei 2021.

E aña akí na Kòrsou un total di 55 skol ku 86 klas ta partisipá na e Prueba Final di Enseñansa di Fundeshi 2021. E alumnonan ku ta partisipá na e prueba final ta di diferente skol repartí bou di shete direktiva di skol regular i kuater privá. E Prueba Final di Enseñansa di Fundeshi 2021 ku ta tèst tres materia tin un total di 270 item:

1. Papiamentu tin 90 item repartí entre ortografia, vokabulario i teksto.
2. Hulandes tin 90 item repartí entre ortografia, vokabulario i lesa teksto.
3. Aritmétika/Matemátika tin 90 item repartí entre abilidat & operashon, midimentu, plaka, tempu & geometria i proporshon, frakshon, porshento & number ku kòma.

Pa tur parti di e prueba final ta usa pregunta di selekshon múltiple (multiple choice) ku opshon di kontesta A-B-C-D. Konstrukshon di e Prueba Final ta tuma lugá kuidadosamente i minusiosamente salí for di kriterionan di kalidat. E Prueba Final ta basá riba e términonan final di Enseñansa di Fundeshi stipulá pa minister di Enseñansa, Siensia, Kultura i Deporte.

Idioma di instrukshon hulandes òf papiamentu: Pa e parti di Aritmétika/Matemátika skol tin e opshon pa laga nan alumnonan traha e parti akí sea na hulandes òf  na papiamentu, esaki dependiendo di e idioma di instrukshon ku e skol ta usa. Di e 1.719 alumnonan na Kòrsou, 1.650 alumno ta traha e parti di Aritmétika/ Matemátika na hulandes i 69 alumno ta traha esaki na papiamentu. E 69 alumnonan ta repartí bou di 4 skol.

COVID i prueba final: Henter aña eskolar e pandemia di Corona tabatin tin biaha ménos, pero mayoria biaha mas influensia riba enseñansa, alumno, tim di skol i mayor/ tutor. Pa baha e preshon i prinsipalmente pa duna mas trankilidat na e alumnonan, a alargá e tempu pa traha e prueba di EFO ku 15 minüt. Esaki lo nifiká pues ku kada parti di hulandes (3x 30 pregunta) lo dura 65 minüt (normalmente 50 minüt) i kada parti di papiamentu (2x 45 pregunta) i aritmétika/matemátika (3x 30 pregunta) lo dura 75 minüt (normalmente 60 minüt).

Resultado Prueba Final Enseñansa di Fundeshi: Sentro di Ekspertisia pa Prueba & Èksamen ta karga e responsabilidat pa konstrukshon,  produkshon, distribushon i korekshon di e Prueba Final di Enseñansa di Fundeshi i ta raportá na direktivanan di skol e resultado ku kada alumno a optené pa e prueba final.

Sinembargo, e konseho final tokante kontinuashon di enseñansa sekundario i e forma ku ta yega na e konseho akí ta prerogativa di direktivanan di skol. Ta entregá resultado di e Prueba Final di Enseñansa di Fundeshi den e di dos siman di yüni 2021 na direktivanan di skol.

Minister di Enseñansa, Siensia, Kultura i Deporte i e tim di Sentro di Ekspertisia pa Prueba i Èksamen ta deseá tur alumno di grupo 8 di Enseñansa di Fundeshi hopi éksito ku klousura di aña eskolar.