Registrashon pa transporte pa skol aña eskolar 2021 – 2022

 

Registrashon pa transporte pa skol aña eskolar 2021 – 2022

Geplaatst op 12 May 2021 dor di Ministerio Enseñansa, Siensia, Kultura & Deporte

WILLEMSTAD –  Entante djaluna 17 di mei 2021 Lokèt di Pèrmit lo kuminsá ku registrashon pa alumnonan bini na remarke pa transporte pa skol pa aña eskolar 2021-2022.  E registrashon ta tuma lugá entre 17 di mei te ku 23 di yüni 2021. Por inskribí e yu(nan) ku mester hasi uso di transporte pa skol na Lokèt di Pèrmit banda di Subway Saliña. Esnan ku ta outorisá pa registrá e yu pa transporte pa skol ta e mayor òf e tutor òf un fundashon (stichting).

Teniendo kuenta ku mester evitá aglomerashon  i mantené distansia sosial konforme e protokòl di Gobièrnu di Kòrsou, Lokèt di Pèrmit ta introdusí 2 forma pa registrá:

• Ta urgí mayor/tutor pa hasi uso di e fasilidat di mail. Mayor/tutor por manda un email ku e dokumentonan bálido i kompleto na transporte.vl@gobiernu.cw. Na momentu ku risibí e petishon via di mail, mayor/tutor ta risibí un kontesta via di mail konfirmando e petishon. Ta pidi pa manda tur dokumento den formato PDF òf JPG. Den kaso ku e dokumentonan no ta kompleto òf korekto mayor/tutor lo risibí un mail pa koregí esaki.
• Den kaso ku no por manda un mail por pasa personalmente riba e dia/fecha ku tin e promé lèter di fam di e yu, entre 8’or di mainta pa 2’or di mèrdia, konforme e skema di registrashon.  Ta bon pa tene na kuenta ku mayor/tutor mester para pafó di e edifisio siguiendo instrukshon di e funshonario di seguridat. Den sala di espera mayor/tutor mester sigui instrukshon di e funshonario ku ta guia e proseso. Lo laga un kantidat limitá drenta edifisio di Lokèt di Pèrmit pa evitá aglomerashon i mantené e distansia nesesario.

Pa hasi petishon mayor/tutor mester presentá ku e dokumentonan nesesario ku ta entre otro:

• un karta di inskripshon firmá i ku stèmpel di e skol;
• sédula di e yu òf su karchi di SVB;
• prueba di entrada di mama i tata òf tutor;
• buki di famia òf trouwboek òf ‘uittreksel’ di Kranshi (NAf. 10.00).

Den kaso ku e yu no haña e karta di inskripshon di e skol na tempu, mayor/tutor por pasa di 21 di yüni 2021 te ku 1 di yüli 2021 pa hasi su petishon.

Lo prosesá solamente petishonnan di kua e dokumentonan ta korekto i kompleto. Ta importante pa e mayor/tutor duna su email i number di telefòn pa por komuniká kuné ora e desishon ta kla.

Pa mas informashon tokante e dokumentonan nesesario por tuma kontakto ku Lokèt di Pèrmit, departamentu di Intake na telefòn 434-1691 òf email transporte.vl@gobiernu.cw.

Download e lista ku: dokumentonan nesesario pa transporte pa skol.