Mauricia Pictures i Help’r ta duna bèk riba dia di Enfermeria (video)

Mauricia Pictures i Help’r ta duna bèk riba dia di Enfermeria 

 

Willemstad – E tim kompleto di Mauricia Pictures i Help’r a kontribuí ku mil amor riba dia di Enfermeria na e selebrashon i produkshon di “APRESIO” ku a tuma lugá na Curaçao Medical Center. Nan a hasi esaki dor di traha di forma kreativo i profeshonal riba e transmishon kompletu di e produkshon bunita aki, speshalmente dediká na nos enfermeronan lokal. Di e manera aki nan a mustra gratitut na tur enfermero riba nan dia i alabes ta spera di a trese alegria pa pueblo di Kòrsou kompletu.

 

Pa Mauricia Pictures i Help’r e kontribushon i gesto di apresio aki ta un símbulo di gratitut pa tur esfuerso hasí dor di nos enfermeronan den kuido durante e periodo pisá ku Kòrsou a enfrentá último simannan. Tur hende por a mira kon nos profeshonalnan den kuido a traha ku alma i kurpa pa yuda tur persona ku a keda kontagiá ku Covid-19. Nan a skohe pa lubidá nan mes i sirbi pueblo di Kòrsou tur dia di nobo i yuda salba bidanan humano ku dedikashon i amor. Nos enfermeronan ta sin mas nos heroenan lokal i ta importante pa nos balorá nan tur dia di nobo. 

 

Pa e motibu aki Mauricia Pictures i Help’r a skohe pa hasi un donashon ku e produkshon kompletu di APRESIO. Tur loke ta entre otro lus, audio, kamarografonan i tur trabou di transmishon ‘live’ a keda profeshonalmente desplegá sin niun kosto pa Curaçao Medical Center i nos enfermeronan. Esaki tabata djis un granito na e totalidat pa asina yuda honra nos personal di kuido i yama nan di kurason: Danki!