Mantenshon di krusada elevá na Dr. Maalweg / Bramendiweg

Mantenshon di krusada elevá na Dr. Maalweg / Bramendiweg

Geplaatst op 10 June 2021 dor di Ministerio Tráfiko, Transporte i Planifikashon Urbano

WILLEMSTAD – Servisio pa Obra Públiko (OW) ta informá tokante trabounan di mantenshon ku lo tuma lugá na e krusada elevá na altura di Dr. Maalweg / Bramendiweg.

Ta asina ku na e krusada akí tin algun klenku ku a lòs i ku ta pone ku na algun kaminda e profil di e krusada a sak. Pa e motibu akí, Servisio pa Obra Públiko huntu ku un kontratista lo bai hasi trabounan di mantenshon, esta saka e klenkunan ku ta lòs, yena santu i pone nan den un linia stret bèk.

Trabounan ta kuminsá djaluna 14 di yüni 2021 i lo dura mas o ménos 1 siman. Pa hasi e trabounan di un manera mas seif tantu pa e outomobilista komo e trahadónan, lo bai desviá e tráfiko den e área akí. Lo bai tin bòrchinan ku ta indiká kon e kaya lo wòrdu desviá.

OW ta pidi tur outomobilista pa kore (bai) ku koutela riba e karetera akí i ta pidi diskulpa pa e inkumbiniensianan ku esaki por trese kuné.