MINISTER PRESIDÈNT PISAS I MINISTER PIETERSZ-JANGA TA APERTURÁ KURSO PA PISKADÓ I MERKADERA ORGANISÁ PA KUP I IPE

MINISTER PRESIDÈNT PISAS I MINISTER PIETERSZ-JANGA TA APERTURÁ KURSO PA PISKADÓ I MERKADERA ORGANISÁ PA KUP I IPE

Willemstad, 30 di Yüni 2021 – Resientemente Federashon Kooperativanan Uní di Produkshon (KUP) den koperashon ku Institute for Professional Excellence (IPE) a duna apertura na e kurso pa piskadó i merkadera.  Tabata Promé Minister di Kòrsou Sr. Gilmar Pisas i Minister di Salubridat Públiko, Medio Ambiente i Naturalesa Dr. Dorothy Pietersz-Janga ku a duna apertura ofisial na e kurso aki.  Meta di e kurso ta pa eduká i konsientisá kursistanan pa ku kuido di piská, garantisando piská di kalidat haltu den nos tur su tayó. Un gran kantidat di kursista a inskribí pa partisipá na e kurso aki, ku ta konsistí di 11 seshon kual ta tuma lugá na Klein Kwartier #33 (antes LVV) di 7’or pa 9’or di anochi. Di e forma aki IPE, den koperashon ku KUP, ta kontribuí na krea mas oportunidat pa trabou den un area ku ta sirbi bienestar i salú di nos komunidat.   

 

Promé Minister Pisas den su introdukshon a bisa di ta aploudí i sostené e inisiativa di KUP i IPE. E la indiká ku tin tur indikashon ku pa banda di luna di Sèptèmber nos por sinti oumento di preis di produktonan importá debí na oumento di preis di fleta. Esaki ta demonstrá e importansha pa produkshon lokal di nos alimentashon.  Ku e mas di 80 kursistanan siguiendo e kurso aki, Kòrsou ta dal un bon paso den direkshon di perkurá pa su propio alimentashon.

 

Dr. Dorothy Pietersz-Janga, Minister di Salubridat Públiko, Medio Ambiente i Naturalesa, a indiká ku den Akuerdo di Gobernashon tin haltu poné nos mes kapasidat pa nos perkurá pa nos alimentashon.  Esaki ta importante pa nos perkurá pa nos salú.  Den mundu tin hopi desaroyo di kuminda produsí na un forma artifisial.  Dor di produsí nos propio alimentashon, nos ta yuda evitá ku nos komunidat ta kome e kuminda artifisial, i konsekuentemente nos por garantisá un komunidat mas salú.  Ministerio di  Salubridat Públiko, Medio Ambiente i Naturalesa ke logra pa mas Yu di Kòrsou ta envolví den perkurá pa nos mes produktonan for di suela i awanan di Kòrsou.

 

Tantu Sr. Franklin Sluis na nòmber di  IPE, komo Sr. Ludson Lucas di KUP, a suprayá e kompromiso pa desaroyá e trabou di peska i merkadera durante nan introdukshon.

 

E kurso aki ta pa piskadó, merkadera i tur persona ku ta deseá na amplia nan konosementu pa loke ta trata atendé ku piská for di momentu ku piska esaki te na momentu ku e piská keda entregá na e kliente.  Kursistanan lo amplia nan konosementu riba entre otro:

  • Desaroyo personal (siña konosé bo mes, asumí responsabilidat i un parti di EHBO den e area);
  • Higiena i kuido di piská (kuido di piská riba laman, limpia i konservá piská durante di benta, ets.);
  • Maneho di empresa chikí (siña i haña tep kon manehá un empresa pa chikí ku e por ta, kosnan básiko di atministrashon, ets.).

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: