REFUERSO TÉKNIKO FEMENINO DI PROFESORA ANA VARGAS PA NOS SELEKSHONNAN NASHONAL FEMENINO!
REFUERSO TÉKNIKO FEMENINO DI PROFESORA ANA VARGAS PA NOS SELEKSHONNAN NASHONAL FEMENINO!
Un di e metanan prinsipal di FFK ta sòru pa tin un ambiente deportivo i sano di moda ku nos muchanan por desaroyá nan talento futbolístiko i asina por ta kompetitivo na nivel nashonal i prinsipalmente riba nivel internashonal. Pa loke ta trata nivel internashonal, nos tin e sumo plaser di informá ku Kòrsou su selekshon nashonal femenino kategoria U-17 lo partisipá na e Concacaf Women’s Under-17 Qualifiers 2021. E partidonan aki lo tuma lugá di 21 pa 29 di ougùstùs 2021 na Bradenton /Florida.
Nos selekshon a kai den grupo B ku ta konsití di; Barbados, Belize, Sint Vincent & The Grenadines i naturalmente Kòrsou.
Manera semper FFK ta tuma su kompromisonan hopi na serio i den e kaso aki ta meskos. Ku bista riba nos kompromisonan e próksimo lunanan ku Concacaf Women’s Under-17 Qualifiers 2021 den ougùstùs binidero i Concacaf Women’s Under-20 Qualifiers 2021 den sèptèmber próksimo, nos a reforsá nos kuerpo tékniko ku un hefe tékniko femenino pa yuda guia e selekshon femenino durante e periodo aki.
Nos ta papia aki di profesora Ana Gisselle Vargas Molina. Profesora Ana Vargas ta di Panama i tin un cv basta ekstenso ku diferente estudio i kursonan di direktor tékniko ku el a optené durante añanan. Sra. Vargas Molina tin hopi eksperiensia guiando selekshonnan femenino na Panama i tin mas ku 16 aña den e mundu di futbòl.
Sra. Vargas Molina a yega Kòrsou djadumingu último i a bai un ‘lunch meeting’ ku e staf tékniko di Kòrsou p’asina sera konosí i interkambiá di idea pa ku nos selekshonnan femenino i nan próksimo kompromisonan. Despues, a lag’é mira poko mas di nos dushi isla i sera konosí un tiki ku nos kultura.
Sra. Vargas Molina lo ta na kabes di e selekshon femenino, reforsá ku e staf eksistente, p’asina pone e selekshon riba un nivel mas haltu pa e kompetensia den luna di ougùstùs 2021 aya na Bradenton/Florida. Tambe ku mira riba e weganan di nos selekshon femenino kategoria U-20 ku lo tuma lugá aki na Kòrsou den sèptèmber, di kual Sra. Vargas Molina tambe lo forma parti di e kuerpo tékniko. Durante e estadia di entrenadó internashonal, lo bai tin tambe seshonan di entrenamentu pa nos hungadónan di Akademia i Elite di dama durante kua lo sigui traha riba desaroyo tékniko i personal di e damanan aki. Di e forma aki ta sigui kultivá hungadónan ku lo por yega na forma parti di nos selekshonanan nashonal i krea un ekipo kompetitivo na nivel internashonal ku lo mester partisipá na torneonan di CFU, CONCACAF i FIFA.
Ya ámbos selekshon a kuminsá ku e práktikanan korespondiente pa saka Kòrsou su kara un biaha mas.
